Illegal nga sugal 4 ka tawo tiklo

CEBU, Philippines - Nasikop  sa nagkalainlaing  team  sa kapolisan  ang mga  suspetsadong  nagpadagan  sa illegal  nga  sugal  sa pagpangronda  nga  ilang  gilusad  sa managlahing  lugar  sa dakbayan  sa Sugbo  ug managlahing  oras.

Kagahapon  sa alas 3:00  sa kaadlawon  nasikop  sa  City Intelligence  Branch (CIB)  ang usa  ka usher sa  illegal  nga  masiao dihang  maghatud  na  unta  kini  sa  mga tip sheets sa nagkalainlaing  lugar  sa  lalawigan.

Kini  human   madawat  sa  mga sakop  sa CIB ang  impormasyon kalabot  ni Winston Catubay, 32, molupyo sa syudad sa Talisay kinsa  nagdala og mga  sinakong tip sheet nga alang  sa  mga  kalungsoran.

Giatangan  dayon  sa kapolisan didto  sa  gawas sa usa ka printing press nga giingong maoy tig-imprinta   sa mga  tipsheet ug  wala  makaikyas ang suspetsado ug nasikop dayon  kini  sa akto nga  nagbitbit   og  mga tipsheet  nga bag-o  kaayong  naimprinta sa  dalan Sikatuna, barangay Day-as ning dakbayan.

Sa imbistigasyon  gibutyag  ni Catubay nga duha pa siya ka adlaw nga nagtrabaho isip carrier apan wala siya masayod nga tip sheets diay ang iyang gipanghatod.

Samtang  sa  pagka-alas 7:00 sa gabii, nasikop usab sa Pardo Police Station ang duha ka lalaki diin usa niini, usher ug  ang usa mitaya og video karera.

Ang kapolisan  nangronda tungod sa illegal nga sugal sa maong  lugar  nga naghitak  ug  gani  nakaabot  na    ngadto   sa may sitio Paradise, sa  barangay Cogon- Pardo  diin  naaktohan usab  sa kapolisan  si Jamesail Alberio nga naglista og mga numero sa masiao ug gikatag  sa yuta ang nagkadaiyang tipsheets. Si Alberio  kinsa buot  untang  modagan, napakyas  kay  na-corner  kini  sa  kapolisan  ug  ang  mga  sugarol  nga  misuway  na  og  taya  nangalibwag  sa pagpanagan.

Samtang nakadawat usab og tawag ang Pardo Police Station kalabot sa  pagbalik  sa mga video karera ug mole-mole  sa sitio Upeba sa maong  barangay hinungdan nga ila usab  kini nga gironda. Didto nasikop sa kapolisan nga nagtuwad-tuwad pagpamupho sa  kuwarta    si Roberto Diyana human siya makadaog sa video karera game.

Samtang  ang kapolisan usab sa RSOG mironda usab sa usa ka boarding house nga gipanag-iya ni Dexter Acebedo usa ka  ilado  kaayong  tigpabrika  sa  mga makina  sa  video karera  ug  mole-mole.

Si deputy chief Romeo Sentinta sa RSOG  mibutyag nga dala  nila  ang search warrant gipanakmit  nila  ang  kahimanan sa paghimo og mga makina sa video karera  ug mole-mole sa sekretong lugar sa maong boarding house.

Hinuon wala  masikop  sa  kapolisan  ang  tag-iya  sa maong  mga  kahimanan ug  sa boarding  house. Maoy  target  sa kapolisan  nga masikop  ang  mga  tigpabrika  og  mga  tipsheets  sa masiao, financier niini  ug  tiggama  og  mga  video karera  ug mole-mole machine. (BANAT NEWS)