Buy-bust 3 nasikop

CEBU, Philippines - Tulo ang nadakpan sa  buy-bust operation nga gilusad  sa   kapolisan sa managlahing  lugar  sa lalawigan  sa Sugbo sa  miaging  gabii. Ang unang buybust operation didto mahitabo sa barangay Balud sa lungsod sa Dalaguete alas 7:30 sa gabii niadtong Biyernes diin ang nadakpan nga suspek mao si Roy Munoz Navarette, alyas Baroy, 54 , minyo, nga nagpuyo sa maong lugar. Si SPO1 Veronico Centino desk officer sa Dalaguete Police Station mibutyag s a Banat News nga ang suspek wala  makabantay sa polis nga nagpaka-aron  ingnong  buyer og  shabu.

 Sa pagtunol  sa suspek  sa usa ka paketeng  shabu,   sa samang  higayon  gidawat usab  niya  ang P500  nga mark money busa gisignit dayon kini sa mga polis. Apan  dihang  gihinol  ang lawas  niini nahikapan pa  sa mga  polis  ang laing plastic nga  gisudlan sa laing upat ka pakite sa shabu busa  gipriso  dayon  kini  sa kapolisan .  Ang maong suspek taud-taod na nga gipanid-an sa kapolisan human kini gidungog nga tigbaligyaan og gidiling drugas sa  maong lugar. Samtang pagka alas 9:47 sa gabii nasikop usab sa laing buy-bust operation ang mag-live in partner  didto sa barangay Arpili sa lungsod sa Balamban.

Ang nasikop mao  sila si Maximo Tranilla alyas Toto , taga sitio Luwas , Arpili , ug usa ka driver  sa  habal-habal ug ang kapuyo niini nga si Mitos Ipanag, hingkod ,  nga Matab-ang siyudad sa Toledo.

Si PO3 Jose Baldecasa sa Balamban Police Station  mitug-an  sa Banat News  nga ang maong magkapuyo nasakmitan  sa kapolisan og 1 ka  pakite sa shabu ug P200  nga buy-bust money, ug cell phone. (BANAT NEWS)