Garbo parelibohan ni Rama

CEBU, Philippines - Awhagon ni Mayor Michael Rama ang kadagkoan sa Camp Crame ug Malacañang nga tangtangon sa iyang katungdanan si Police Regional Office (PRO)-7 director Marcelo Garbo.

Gihulagway ni Rama nga si Garbo miabuso sa iyang katungdanan pinaagi sa pagdistino og hilabihan ka daghang mga polis didto sa Kapitolyo, ilabi na dihang gitrangkahan ang opisina ni suspendidong gobernador Gwen Garcia.

Ang mayor miingon nga kay ang mayor gi-deputize man sa National Police Commission (Napolcom) ug gihatagan og katungod sa pagsuperbisar sa mga polis sa iyang lugar, dili unta magbasta-basta si Garbo pagdistino og mga polis nga dili mananghid kaniya.

Apan ang kritiko ni Rama nga si Kongresista Tomas Osmeña abtik nga midepensa ni Garbo pinaagi sa pag-ingon nga wala sa balaud nga mananghid pa ang regional director sa kapolisan kun mohimo kini og lakang aron mapugngan ang kagubot.

Matud ni Osmeña nga anaa ra ni Rama nga usa ka abogado kun unayon niya sa pag-ilad ang iyang kaugalingon.

Si Rama miingon nga padad-an niya’g suwat sila si PNP Chief Allan Purisima, Presidente Aquino ug Bise Presidente Jejomar Binay aron awhagon nga tangtangon dayon si Garbo sa iyang katungdanan.

Apan matud ni Osmeña nga klaro kaayo nga si Rama nanalipod pag-ayo ni Gwen kay alalay man silang duha. Nasuko si Rama nga daghang mga polis ang mibantay dihang gipatrangkahan ni acting governor Agnes Magpale ang opisina ni Gwen atul nga mibisita kini didto sa Oslob.

Si Garbo pabiling nagpakahilom sa isyu gawas sa pag-ingon nga gituman ra niya ang iyang katungdanan aron sa pagsiguro nga walay kagubot nga mahitabo diha sa Kapitolyo.

Apan si Rama miinsistir nga ang pagbutang og daghang mga polis sa Kapitolyo hayan makadaut sa imahe sa dakbayan sa Sugbo.  (BANAT NEWS)