Inahan gipusil patay bilas?

CEBU, Philippines - Namatay  diha-diha   ang usa ka inahan human  matud  pa  kini pusila sa iyang bilas didto sa sitio Almutra, barangay Tisa, dakbayan  sa Sugbo sa miaging  gabii.

Ang biktima nailhan nga si Vivian Moran, hingkod  ug molupyo sa maong lugar samtang ang suspetsado mao  ang  iyang  bilas nga si Loreto Benito alyas  Boy.

Matud pa sa higala sa biktima nga si Cirilina Dalogdog, nga nag-inom siya  ug  ang biktima sa gawas sa balay sa biktima dihang  kalit  lang  mitungha  si Benito,  busa  gitunolan  nila  kini  sa alak  nga ilang giinom.

Apan giingong  kalit lang  nagkalalis ang biktima ug si Benito tungod kay nasuko  ang suspek kay wala  kuno taronga og  tagad   sa  biktima  ang    mga anak  niini. 

Unya si Dalogdog  mibiya  og  kadiyot  kay  miadto  sa pansayan, apan mao  na lay  iyang nabati ang  buto  sa armas de fuego ug  sa paggawas  niya  nakurat  na lang  siya  dihang nagbuy-od na  sa yuta  ang  biktima  nga naglunang  sa dugo   nga  wala  nay  kinabuhi.

Nagtuo si Dalogdog nga si Benito gayud ang mipusil sa biktima kay may  dala  man  kining  armas ug gani iya pa man  kining  gikomedyahan sa  wala  pa  ang  hitabo  nga hulaman  niya   ang maong armas.

“Nasuko man si Kuya Boy kay gipasagdan lang daw ang mga bata, wala atimana, gi-una lang daw ang laki mao to ilang gilalisan, unya wala lang ko manghilabot kay ila baya nah, mibiya ko kay nag-cr pagbalik nako nahagba na siya,” matud pa ni Dalogdog.

Si Benito kinsa giingong misibat dayon  human  sa hitabo, nasikop ra usab sa kapolisan sa Mobile Patrol Group pinaagi usab sa tabang ni SPO2 Herbert Diola nga molupyo sa maong lugar.

Hinuon  hugtanong  gipanghimakak  niini  ang  pasangil  nga  siya  mipatay sa biktima              “Naglagot lagi ko, pero taman ra sa paglagot, gusto nako nga atimanon niya iyang mga anak, mao ra na wa koy giplano nga kutloon iyang kinabuhi, unsa mana ug patyon nako si Vivian kinsa may mubuhi ana, kami maproblema,” saysay pa ni Benito

Samtang si SPO3 Rey Cuyos sa Homicide Section, mibutyag usab sa Banat News nga ilang gikonsiderar nga suspetsado si Benito base sa gisaysay  sa saksi sa hitabo.

Gawas niini, gibasehan usab ni Cuyos  ang nahitabong panaglalis sa duha sa wala pa ang hitabo.  (BANAT NEWS)