P500mil nga mga kahoy sikop

CEBU, Philippines - Gibana-bana nga mokabat sa P500,000 ang kantidad sa nagkalain-laing matang sa kahoy  nga nasakmit  sa  mga  operatiba sa Criminal Investigation and Detection Group (CIDG)-7 didto sa Sitio Labrador, Barangay Tangke, siyudad sa Talisay, kagahapon  sa kaadlawon. Ang nagdala sa maong  mga  pinayuhot  nga kahoy nga  nasikop  sa  mga otoridad  mao  sila si Nonelito Abay, 40; manghod niini nga si Michael Abay, 28, nanimuyo sa maong barangay ug si Alfredo Rolido, 68, taga-Barangay Pajo, dakbayan sa Lapu-Lapu. Ang  mga  kahoy  nga nasakmit sa mga otoridad mao ang Lawaan  ug  uban  pa. Gipangulohan ni Supt. Nelvin Ricohermoso,ang team  sa CIDG , human  sila makadawat  og  taho  gikan sa usa ka concerned citizen kalabot  sa maong  kargamento  nga gisakay  og  pumpboat gikan sa Surigao City   niadtong  Huwebes  sa alas 5:00  sa hapon. Ang  mga  operatiba  sa CIDG  mipahibawo  dayon  sa  mga  kapolisan  sa Talisay City Police Station ug sa Provincial Environment and Natural Office (PENRO).

Sa  ilang  pag-abot  didto  sa maong  lugar naabtan  nila  sa akto  ang  grupo nga naghinabwaay  pa sa nagkadaiyang  klase  sa kahoy gikan  sa pumpboat nga may  markang  JEARFON.

Dihang  miduol  ang  mga polis  kanila mikaratel  og  dagan  ang  uban  nga  kauban sa grupo  ug  ang  tulo  maoy  nasikop  sa kapolisan. Si Rolido nga miangkon nga asset sa PENRO  wala  ilha  sa taga  PENRO.

Samtang  ang managsoong  Abay mibutyag nga igo lang sila nga gikuha aron sa paghabwa sa mga kahoy gikan sa pumpboat una kini dad-on sa siyudad sa Sugbo.

Ang mga suspek gibalhug dayon  sa karsel sa CIDG-7 samtang ang mga kahoy tua  na sa  bodega sa PENRO.

Kasong kalapasan sa Section 69 sa P.D. 705 o The Forestry Reform Code of the Philippines ang ipasaka batok sa mga suspek.  (BANAT NEWS)