Pamusil 2 patay 1 angol

CEBU, Philippines - Duha  ang  patay  samtang  usa  ang  angol  sa pagpamusil  nga nahitabo  sa lungsod  sa Dalaguete  ug dakbayan  sa Toledo  sa  miaging  adlaw.

Ang  mga nakabsan sa kinabuhi  mao  sila si Helardo Barrit De Luna, 39, ulitawo, usa  ka  mag-uuma nga taga sitio  Cabungahan, barangay  Manlapay, lungsod  sa Dalaguete, ug  Dexter Relinte Tejadillo, 28, taga Estaka, lungsod  sa  Minglanilla, samtang  ang  naangol  mao usab  si Rene Requina, hingkod, ug mag-uuma  gihapon  nga silingan  ni de Luna.

Ang  mipusil kang de Luna ug miangol  ni Requina  mao  ang  tulo ka wala hiilhing lalaki  nga  nagsakay  og  usa  ka motorsiklo. Si PO2 Godofredo Glepa sa Dalaguete Police Station mibutyag sa Banat News nga nasayran  nila  ang  hitabo  pinaagi  sa   report  sa  usa  ka   kapitan sa barangay  sa   dapit  nga nahitaboan.

Naabtan  sa kapolisan  sa dapit  nga  nahitaboan si de Luna    nga  wala  nay  kinabuhi kansang  lawas  naputos  sa mga samad pinusilan samtang  si Requina kinsa  samdan  sa abaga maoy  gihatud dayon nila sa tambalanan. Nasayran  sa kapolisan   nga ang mga biktima gikan sa barangay Manluray ug nagpakyaw og habal habal paingon sa barangay Manlapay.

Apan pag-abot nila sa Sityo Cayapok –yapokan, namatikdan  nila  ang  mga  kriminal  nga nagsunod sa ilang  gisakyan nga motor  ug  sa ilang pag-abot sa maong lugar mipaduol kini kanila ug ang duha ka angkas maoy mipusil sa mga biktima ug  si  de Luna nga maoy  naglingkod  sa luyo maoy  natusak  sa mga  bala    busa natagak  kini  sa motorsiklo   ug namatay. Si Requina  nga  maoy  atubangan  ni de Luna  igo  lang  natapsingan  sa abaga, samtang  si Romnick Requina  nga maoy  nagmaneho  sa motor  ug  ang  usa  ka  kauban  nila  nga  si Ronad Emponti wala  maigo  ug  nakadagan  sa kalibonan  human matumba  ang  ilang  motor.

Ang mga namanhig  kanila  dali  usab  kaayong  nakapahilayo  sa  maong  lugar. Samtang  si Tejadillo  nagsakay  sa iyang  motorsiklo paingon  sa Toledo  gikan  sa barangay  Matab-ang.  (BANAT NEWS)