Talisay nakadawat og presidential award

CEBU, Philippines - Ang syudad sa Talisay sa Sugbo ug ang lungsod sa Tubigon, ug Pilar sa Bohol  bag-ohay lang nakadawat og Presidential Award isip Child-Friendly Municipality and City (CFMC) sa Central Visayas sa tuig 2012.

Matud pa ni Jaybee Binghay, tigpamaba sa Department of Social Welfare and Development (DSWD-7) nga kining maong Presidential Award alang sa CFMC gilusad  niadtong Nobiyembre  1999 isip suporta  nga aktibidad alang sa Child Friendly movement nga gipasiugdahan sa Council for the Welfare of Children (CWC).

Dugang pa ni Binghay nga kining maong pasidungog gipresentar agi og pasidungog sa mahinungdanong papel sa Local Government Units (LGU's) alang sa promosyon, proteksyon ug partisipasyon ug  pagdumalang mahigalaon  sa kabataan.

Gipadayag ni Binghay nga tumong niini mao ang pag-ila og child friendly environment sa nasud ug pinaagi  sa maong  pasidungog makakat-on ang  konseho sa paghatag og prayoridad sa pagtubag sa mga isyu nga nakaapekto sa  kabataan .

Pinaagi  usab  niini  mamonitor ang gipatumang  mga  programa alang sa kabataan. Ang mga nakadawat og pasidungog  gi-screen sa evaluation committee  nga naglangkob sa Regional Representatives gikan sa Department of Interior and Local Government (DILG), Department of Education (DepEd), Department of Health (DOH), National Economic  Development Authority (NEDA) ug ang Department of Social Welfare and Development (DSWD) nga gidumala pa ni DSWD 7 Regional Director Ma. Evelyn Macapobre.

Sumala pa ni Binghay nga ang mga nakadawat og pasidungog may ganti  nga  P50, 000 nga kantidad matag usa ug usab Child-friendly Seal gikan sa Council for the Welfare of Children (CWC).

Gibutyag ni Binghay nga ang mga rehiyonal nga mananaog sa umaabot maoy makigsangka  sa national search nga ipahigayon didto sa Manila ning tuiga.  (BANAT NEWS)