Magpale posibleng mobalhin sa governor’s office

CEBU, Philippines - Gipadayag ni Acting Governor Agnes Magpale ang iyang tinguha nga mobalhin og opisina diha sa gikandaduhan nga buhatan sa gobernador sa Kapitolyo.

Gibutyag ni Magpale atol sa interbyu sa Bantay Radyo nga iyaha pang gipa- imbentaryo ang tanang mga butang sulod sa gipasirad-an nga buhatan ni suspended governor Gwendolyn Garcia.

Gipasabot ni Magpale nga gikinahanglan na siyang mobalhin og opisina sa maong buhatan isip acting governor tungod kay nagpakisayod na usab si Acting Vice Governor Julian Bacus Daan kun asa siya mamahimong mag-opisina.

Gibarugan ni Magpale nga legal ang iyang pagpasira sa buhatan ni Garcia niadtong miaging hapon ug dili tinuod ang pasangil nga gitanggong nila ang mga kaswal nga kawani sa suspendidong gobernador tungod kay gitugutan man kini nga makagawas apan wala lay gitugutan nga makasulod og balik.

Gipadayag ni Magpale nga wala usab siya mahadlok sa bahad nga pagpasaka og mga kaso sa kampo ni Garcia batok niya tungod kay andam niya kining atubangon.

Sa habig sa kaswal nga kawani ni Garcia gipadayag niini nga bukas siya sa negosasyon alang sa posibling pagpadayun sa ilang trabaho apan dili siya motugot nga anha kini ibalhin og destino sa iyang buhatan tungod kay dili siya komportable makatrabaho ang mga tawo nga wala siyay pagsalig.

Nagkanayun si Magpale nga subli nilang i-review ang kontrata sa tanang kaswal nga kawani kun angay bang ipadayon ang ilang mga kontrata.  (BANAT NEWS)