Mga armas ug bala nasakmit sa CIDG-7

CEBU, Philippines - Ang operatiba sa Criminal Investigation and Detection Group (CIDG)-7 nakasakmit og nagkalain-laing matang sa armas ug mga bala sa gipahigayon niini nga operasyon batok sa loose firearms kagahapon sa buntag sa Sitio Guisok, Barangay Tuburan Sur, Medellin.

Ang operatiba armado sa search warrant for RA 8294 o Illegal Possession of Firearms dihang ilang gidakop ang suspek nga si Lolito Casas Mangas mga alas  6:00 sa buntag.

Ang maong warrant giluwatan ni Hon. Teresita Galanida sa Regional Trial Court, Branch 56, Mandaue City Prosecutor’s Office.

Nakuha sa operatiba ang usa ka AR-15 Rifle, usa ka caliber .9mm pistol uban sa usa ka  magazine, usa ka Colt Defender caliber .9mm pistol nga adunay usa ka magazine, .22 revolver, ug  .38 revolver.

Ubay-ubay usab nga mga bala sa gauge shotgun, .45 pistol, ug 9mm pistol ang nakuha sa kapolisan gikan sa suspek. Nakuha usab ang 450 ka nilikit nga marijuana nga gidala na sa Philippine National Police Crime Laboratory-7 sa Camp Sotero Cabahug, siyudad sa Sugbo alang sa chemical analysis.

Si Mangas nagtingkagol na karon sa karsel sa CIDG-7 samtang kasong RA 9165 o illegal nga paghupot sa illegal nga drugas ang ipasaka batok kaniya.

Si Chief Insp. Germano Mallari, team leader, mibutyag nga giplano gilayon nila ang pagsikop kang Mangas dihang nadawat nila ang warrant adtong Miyerkules.

 Si Mangas giingong stockholder og armas gikan sa mga illegal nga manghimoay sa naasoy nga barangay.

“Siya ang bilinanan og naay mopalit sa iyaha ra kuhaon,” matud ni Mallari.

Apan si Mangas miasoy nga duha ka mga tawo ang mibilin kaniya sa maong mga armas ug misaad nga kuhaon kini sunod semana bugti sa kwarta.

“Sunod semana kuno nila kuhaon pero wala pud ko kahibalo og pila ang ihatag sa akoa,” matud pa ni Mangas.

Si Mangas miangkon nga illegal ang iyang gibuhat apan napugos lang siya tungod sa kawad-on.  (BANAT NEWS)