20 NPA suspects sa Negros ambush nailhan

BACOLOD City, Philippines —Nailhan na sa kapolisan ang dili momenus 20 ka mga miyembro sa New Peoples Army nga mi-ambush sa mga sibilyan ug mga polis niadtong nakalabay nga adlaw’ng Domingo sa lungsod sa La Castellana, Negros Occidental.

Siyam ka mga tawo, walo niini pulos sibilyan lakip ang usa ka babaye ang nakalas dihang kalit gi-ambush sa trak de karga nga ilang gisakyan gikan sa usa ka pista diin ang mga polis ug mga tanod mitabang sa pagbantay.

Si Senior Supt. Celestino Guara Jr., ang acting Negros Occidental police director miingon nga nailhan na nila ang mi-masaker sa mga sibilyan base sa nakuha nilang mga impormasyon sa intelligence community.

Matud pa ni Guara  ang mga survivors nakaila sa pipila sa mga NPA nga mi-ambush kanila ug giingong nagbase ang ubang mga NPA nga miapil sa ambush sa Southern Negros.

Hinuon giklaro ni Guara nga ilaha pang kompirmahon ang maong mga pangalan kutob kagahapon. Kasong murder ug frustrated murder ang ipasaka batok sa mga suspek kagahapon o ba kaha sa sunod semana.

Kapin sa 300 ka basiyo sa mga high-powered firearms, sama sa M14 , M16,  ug  AK 47 assault rifles ang nakuha diha sa crime scene. Ang maong mga armas maoy sagad nga gidala sa mga NPA sa Negros.

Ang mga nakalas mao si Police Officer 1 Richard Canja, nga maoy gituohang target sa mga NPA, naapil sa mga namatay sila si Jonathan Mateo, Ulysses Tamayor;  Ramil Compleza; Mario Ricablanca ; Timoteo Esplegera; driver Ricky Dingcong; ug sila si Lito Lucban ug Virginia Ordoñez.

Tungod sa maong insidente gibutang karon sa listahan sa election watchlist area sa Negros Occidental ang maong lungsod sumala pa sa Provincial Joint Peace and Security Coordinating Center, nga gilangkuban sa Commission on Elections, Philippine National Police ug Philippine Army.

Sa pagkakaron, duna nay dose ka mga lugar sa Negros Occidental ang gibutang sa watchlist tungod sa posibilidad nga may moulbong kagubot tungod sa mga armadong grupo nga naglihok sa maong lugar.

Nagkadaghan usab ang mga grupong mi-kondenar sa gihimo sa NPA, ug ning uwahi lang ang Bayan Muna, Peace Advocates of Negros ug  Diocese of Bacolod mikondenar usab sa maong krimen.

Ang Commission on Human Rights mihimo na og parallel investigation sa maong ambush. (BANAT NEWS)