Operasyon sa quarry buot ipasuspenso sa mga residente sa Lagtang

CEBU, Philippines - Human sa mga nadawat nga reklamo gikan sa ilang mga silingan kabahin sa quarry diha sa ilang lugar sa sitio Burlas, barangay Lagtang, dakbayan sa Talisay ang presidente sa Sangguniang Kabataan Federation nga si John Carmel Burlas mipalabang kini og resolusyon niadtong Martes sa buntag atol sa gipahigayong regular session sa konseho sa Talisay.

Si Burlas nga nahinabi sa mga tigbalita nagkanayon   nga 60 ka mga residente sa lugar o ilang mga silingan ang mipirma og petisyon batok sa Trinidad quarry tungod sa giingong kaabog nga namugna niini. Matud ni Burlas nga ang maong petisyon giduso kini sa ilang mga silingan ngadto sa iyang buhatan ug nangayo og panabang nga masuspenso ang operasyon sa quarry.

Ang presidente sa SKF nagkanayon nga nabalaka silang maapektohan ang panglawas sa mga residente ilabi na sa mga bata tungod sa kaabog.

Ug gawas niini delikado usab nga makamugna og disgrasya sa mga motorista ang kaabog diha sa lugar tungod kay dunay posibilidad nga ang drayber sa motorsiklo mapuling o ba kaha mopiyong sa ilang mga mata sa kaabog.

Gawas sa abog kung mo uwan grabe usab kaayo ang lapok diha sa ilang lugar tungod sa yuta nga giingong gikan sa quarry ug nabalaka usab sila nga dunay mahitabong pagdahili sa yuta.

Sa laing bahin, si Konsehal Bernard Odilao kinsa maoy chairman sa environment nagkanayon kini nga naghuwat siya nga mosubmitir si Burlas sa kopya sa petisyon sa mga residente sa lugar alang sa imbestigasyon nga himoon sa iyang buhatan.  (BANAT NEWS)