Bana gipusil patay sulod sa balay

CEBU, Philippines - Patay na nga naabtan sa asawa ang 60 anyos niyang bana nga nagbuy-od sa sofa sulod sa ilang balay kansang ulo  may  samad pinusilan  gikan sa mipusil  niini  nga wala  hiilhi didto sa Sitio Grahe barangay Antipolo sa lungsod sa Medillen niadtong Martes sa alas 9:30 sa gabii.

Ang biktima mao si Nicolas Soon, 50, minyo ug molupyo sa nahisgutang lugar.

Si PO2 Renato Nogas sa Medillen Police Station mibutyag  sa Banat News nga  si Araceli, ang asawa  sa  biktima misumbong kanila nga sa iyang pagpauli sa balay gikan sa trabaho  nakurat  na lang kini   dihang maoy  misugat  sa iyang panan-aw ang  iyang  bana  nga wala  nay kinabuhi  nga  nagbuy-od  sa sofa.

Matud  pa  ni PO2 Nogas  nga sa ilang  pagsusi  ilang  nasuta  nga samaran kini  sa ulo agi  sa bala  sa wala pa masuta  nga  kalibre sumala ni Dr. Jude Palilio  nga maoy  mihiling  sa lawas  sa biktima.

Dugang inpormasyon nga nahipos sa kapolisan gikan sa mga silingan nga nianang kaadlawon nakig-inom pa ang biktima sa iyang mga barkada nga nailhan lang  pinaagi  sa ilang  angga nga Boning ug  Al-al.

Dihang  nakahurot na sa usa ka botelya nga bino nga ilang giinom namauli ang  duha  ka  higala  sa biktima.

Apan  nianang   pagka- alas 7:00 sa gabii nakadungog ang  mga  silingan og lanog nga buto sa armas  gikan sa balay  sa biktima   ug ang  asawa na  niini  maoy  nakadiskobre  sa nahitabo  sa iyang  bana.

Ang kapolisan mipahigayon  pa  og  background check sa biktima aron matino ang motibo sa maong  pagpatay ug matumbok ang mga responsabli sa kremin. (BANAT NEWS)