Miihaw sa apohan ug apo gikasohan na human hidakpi
CEBU, Philippines - Kasong robbery with homicide ang gi-andam sa kapolisan nga ipasaka batok sa duha ka mga batan-ong suspek nga mitusak-tusak og dunggab sa kalawasan sa apohan ug sa apo niining 9 anyos sulod sa ilang pinuy-anan didto sa Sitio Bagong Lipunan, barangay Cabangbang, Bantayan Island niadtong Lunes sa kaadlawon.
Ang gipasakaan og kaso human masikop ug miangkon sa maong krimen mao sila si Ruben Desamparado Tapion, 20 ug Rommel Dela Pena, 21, nga pulos silingan sa mga biktima.
Si Sr/Insp. Ildefonso Miranda Jr., hepe sa Bantayan Police Station mibutyag sa Banat News nga ugma pa sa buntag nila ipasaka ang kaso tungod kay wala sila kahigayon paglarga kagahapon tungod sa kadagko sa bawod sa dagat ug walay mibeyahe nga barko paingon sa mainland Cebu.
Dugang ni Sr/Insp. Miranda nga nasulbad na ang maong krimen human masikop ang mga suspek apan padayun pa nilang gipangita ang lain pang 2 ngadto sa 3 ka kauban niini nga naglisud sila og kuha og detalye tungod kay dili gyud motug-an ang mga nadakpang suspek.
Matud ni Sr/Insp. Miranda nga aduna pay kauban ang maong mga suspek ug ang maong grupo maoy responsabli sa mga pagpangawat sa ilang dapit. Gani matud pa ni Miranda ang maong mga suspek nakapangawat na sa balay gihapon sa mga biktima sa miaging tuig apan wala kini kapasakai og kaso sa biktima.
Ang biktima nga si Patricia Desamparado Batoy alyas Patring, 74, kinsa naila nga tigpa-utang og kwarta sa maong lugar nasugamak sa kapin sa napulo ka samad dinunggaban sa lawas ingon man usab ang iyang 9 anyos nga apo nga si Angelica Pasilaban ug nagtupad sila nga naghigda sa katre nga wala nay kinabuhi sulod sa kwarto sa ilang pinuy-anan. (BANAT NEWS)
- Latest
