Balay sugalan sa Banawa girakrakan sa nag-motor

CEBU, Philippines - Nautingkay  ang mga residente sa  R. Duterte street sa   sitio Banawa,  barangay Guadalupe  dakbayan  sa Sugbo  dihang  usa  ka   panimalay  sa maong lugar  gipasalbahan  sa  wala  hiilhing  armadong  mga  tawo pasado alas 10:00 sa miaging Martes  sa gabii.

Dihang  gisusi  sa   mga  molupyo  ang  dapit nga  gigikanan  sa  maong  buto-buto  sa  mga  armas, maoy  ilang  nakita   ang usa ka papel nga gipapilit sa gate sa usa ka compound sa maong lugar  nga  gisuwatan og “Undanga na ninyo ang illegal nga sugal para walay dautang mahitabo ninyo tanan.”

Pipila ka mga estambay sa maong lugar miila sa tag-iya sa maong lugar nga usa ka Diego Famador.

Ang kapolisan, misuway sa pagsampit unta sa mga tagtungod sa   maong balay apan walay bisan usa nga  mitubag   gawas  sa iro nga nagpunay og paghot. Si Junjun, (tinuod ngalan gipugngan) 16-anyos nga molupyo sa maong lugar mibutyag nga human sa buto-buto iyang nakit-an ang motorsiklo   kansang  plate number  gitaptapan   nga gisakyan  og  duha ka tawo  ug kusog  kaayong  mipadagan niini  human  magpabuto  sa ilang  armas.

Napunitan  sa mga  polis  sa lugar  nga gipasalbahan  mao   ang tulo ka kabhang sa mga bala   nga gituohang kalibre .45 nga maoy gigamit sa nagpabuto.

Hinuon nasuta  nga  walay  naigo  nga  tawo  sa maong  pagpabuto.

Sa pakighinabi sa Banat News sa hepe sa kapolisan sa City Intelligence Branch (CIB) Chief Inspector Romeo Santander, mibutyag kini nga sa ilang pagsusi sa maong ngalan sa ilang listahan sa mga bigtime financier ilang nakita ang ngalan sa usa ka Diego Famador.

Hinungdan nga dako ang ilang pagduda nga ang panimalay nga gipusil ug gipapitlan og papel nga adunay hulga, posibling gipanag-iya usab og tawo nga adunay kalambigitan sa illegal nga sugal. (BANAT NEWS)