Opisina ni Gwen gi-padlock

CEBU, Philippines - Nagkaguliyang  ang  mga kawani  nga suporter ni suspended governor  Gwendolyn  Garcia  human i-padlock  sa kapolisan ang  opisina  niini  sa mando  ni acting governor Agnes Magpale  kagahapon  sa alas 2:00  pasado  sa hapon.

Ang  pag-padlock  giatol  sa kapolisan   nga  wala  pa mahibalik  si Garcia human  kini  mogawas  niadtong  Martes  sa gabii  kay  miadto  sa lungsod  sa Oslob. 

Si Elizabeth Francia, chief of staff ni Garcia  nagkanayon  nga wala  sila  pahibaw-a  kalabot  sa maong  pagpasira  sa opisina sa gobernador  ug  didto  na  sila masayud  niini  sa taga  media.

Matud  pa  niya  nga  usa  kini  ka tataw kaayong  paglapas  sa ilang  tawhanong  katungod.

Sayo sa buntag kagahapon  mipaduol ang kapolisan nga nagbantay sa gate sa Kapitolyo  ngadto sa buhatan ni Garcia apan kalit kining namalik sa ilang puwesto dihang giatubang kini ni kanhi Capitol consultant on security Byron Garcia ug gipangayoan og security detail order   apan napakyas   sila  sa pagpakita niini.

Apan namalik ang nahisgutang mga polis pasado alas 2:00  sa hapon ug dayon gipadlakan ang ganghaan paingon sa buhatan sa gobernador pinaagi sa paglansang sa sira  niini  sa pultahan.

Gumikan  niini   nabalisa kaayo   ang  mga kawani sa suspendidong gobernador  kauban sa mga sakop sa media nga maoy nakasaksi sa maong insidente. Subay niini, ang anak ug usa sa mga abogado ni  Garcia nga si Atty. Cristina Garcia Frasco mipasidaan  nga mag-atubang og kasong criminal si  Magpale kung pugson gayud niini pagsira ang buhatan sa iyang  inahan  ilabi  na  kun  lakip  ang  mga  personal  nga  kabtangan  niini  panghilabtan.

Nasayran nga misugod na sa pagsuroy si suspended governor  Garcia sa mga kalungsoran sa lalawigan sa Sugbo subay sa hangyo sa mga mayor  nga gimingaw na kaniya.

Samtang  si manlalaban  Lito Astillero, usa  usab  sa  mga  abogado  ni  Garcia  nagkanayon  nga wala  sila makapangandam  kay  nadawat  nila  ang  formal  order  human  na  ipadlak  ang  opisina  sa gobernador.

Gawas  niini  ang maong  orden  didto  i-address ni Magpale  kang  provincial administrator Eduardo Jabin, ug  dili ngadto  sa kampo  ni Garcia, sumala  ni  Astillero.

Gisaway  ni Astillero ang  kapolisan  nga  pulos armado  nga unta  silang  mga  kawani  wala  may  mga  armas  ug  dili  usab  sila  mga  kaaway.

Apan  si Supt, Leopoldo   Cabanag sa Regional  Safety Battalion (RSB) nagkanayon  nga  ang  ilang  pag-adto  sa  Kapitolyo  maoy  pagtuman  nila  sa hangyo  ni Magpale  kinsa  gustong  mahimutang  sa seguro  ang  Kapitolyo. Gisukit sa  kampo  ni  Garcia  si Magpale  nganong  iya  kining  gihimo  nga unta  sa milabay’ng semana  misaad  man  kini  nga  dili niya  ipadlak  ang  opisina  ni  Garcia.

Apan gitubag  usab  kini  ni  Magpale  pinaagi  sa pag-ingon  nga  human  niya hisayri  nga mibiya  na  si  Garcia  sa iyang  buhatan,  nakadesisyon  siya  nga pasirad-an  ang  maong  opisina aron magamit  kini  sa mga  mahinungdanong  kalihokan  sa Kapitolyo.

“You know for longest time, we have tolerated the presence of the suspended governor, she is not entitled to an office anymore, no salary, much less an office and staff but we just tolerated for the longest time that she has stayed there. But since we discovered that she left the office last night, this is already too much”, matud  ni Magpale. (BANAT NEWS)