Mananahi gisaka sa balay gipusil sa ulo patay

CEBU, Philippines - Patay nang nadangat sa tambalanan ang usa ka mananahi nga ginang human kini gisulod sa iyang balay ug gipusil sa ulo ug lawas samtang naglung-ag sa pamahaw sa bukirang bahin sa barangay Bugho sa lungsod sa San Fernando niadtong Lunes sa alas 5:00 sa buntag.

Ang biktima mao si Eusebia Canoy, 39, nagpuyo sa maong lugar ug usa ka mananahi ug dunay balay usab didto sa lungsod sa Minglanillla.

Samtang duha ka mga lalaki nga sakay og motorsiklo ang gitumbok sa mga silingan nga responsable sa krimen.

Matud ni PO2 Jose Claire Palagtiosa sa San Fernando Police Station dihang nahinabi sa Banat News kalit lang niabot ang duha ka lalaking nag-motorsiklo  ug ang angkas diretsong nisaka sa balay sa biktima ug  gipusil  kini duha ka higayon.

Ang biktima naigo sa tuong bahin sa ulo ug naigo usab sa iyang tiyan una pa nanaug ang killer ug mibalik sa kauban dayon misibat palayo. Ang biktima gisuwayan pa unta og hatud sa Minglanilla District Hospital apan gideklarar na kini nga dead on arrival.

Subay sa pasiunang imbestigasyon sa kapulisan, ang biktima taga lungsod sa Minglanilla apan nakapalit og yuta diha sa maong lugar nga iyang gitukoran og balay ug mag-anhaan lang kini sa maong dapit.

Dugang nahipos nga inpormasyon nga ang yuta nga napalit sa biktima dunay mga namuyo nga gikabangi sa biktima ug gani nagka-atubang sila niini sa barangay.

Mao kini karoy gisubay nga posibleng motibo sa nahitabung krimen apan wala usab isalikway ang uban pang anggulo. (BANAT NEWS)