Lola ug apo gitulis gipamatay

CEBU, Philippines - Gidunggab makadaghang higayun hangtud nga namatay pagkahuman gitulis ang 74-anyos nga lola nga tigpatanto apil na ang 9-anyos niyang apo nga babaye sulod sa ilang pinuy-anan sa upat ka mga tawo diha sa Sityo Bagong Lipunan sa barangay Cabangbang sa lungsod sa Bantayan sa isla sa Bantayan.

Nadiskubrehan lang ang krimen niadtong Lunes sa buntag apan gituohang kaadlawon pa kini nahitabo.

Ang mga biktima nga patay nang napalgan mao si Patricia Desamparado Batoy alyas Patring, 74-anyos, biyuda nagpuyo sa maong lugar nagpautang og kwarta, ug dunay tindahan ug namaligya og tubig. Siya nakaangkon og siyam ka samad dinunggaban sa kalawasan.

Samtang ang apo niini nga si Angelica Pasilaban alyas Angel, 9,  tinun-an sa grade-3 sa Veto Elementary School  nakaangkon usab og dinunggaban sa gusok ug ilok.

Nadakpan hinuon dayun paglabay sa pipila ka oras ang duha sa upat ka mga suspek nga sila si Ruben Desamparado Tapion, 20,  ug Rommel Dela Peña alyas Maymay, 21, pulos mga silingan sa mga biktima.

Padayon pang gipangita ang duha ka mga kauban sa duha nga wala hinganli sa mga nadakpan.

Matud ni Sr.Insp. Ildefonso Miranda Jr., hepe sa Bantayan Police dihang nahinabi sa Banat News ang mga silingan nga magpalitan og tubig kang Batoy maoy nakadiskubre sa mga patay’ng lawas.

Matud pa nahibulong sila nga walay motubag sa ilang pagsampit kay mopalit unta sila og tubig maong dunay milipot sa luyo sa balay ug ilang nakit-an ang mga lama ug pat-ak pat-ak sa dugo sa semento ug bintana maong misumbong sila dayon sa kapulisan.

Sa gihimong pakisusi sa mga polis didto nakit-an ang  lola ug ang apo niini nga nagtupad sa kwarto nga pulos patay na.

Nasuta nga ang mga suspek nag-inom pa kini nianang pagkagabii dili layo sa pinuy-anan sa mga biktima ug diha pa sa tindahan sa biktima nagpalit og bino.

Ang suspek nga si Tapion maoy unang nadakpan human maabti sa mga polis alas 9:00 sa buntag nga mosakay na unta og barko sa pantalan sa Sta. Fe kay mosibat.

Nakuha gikan niya ang bag sa biktima nga dunay sulod nga mga singsing ug kwarta nga P4 mil ug diha pay picture sa biktima.

Samtang sa dugang follow up operation sa kapulisan sa kapulisan nadakpan usab si Ramirez  human nahibaw-an sa mga polis nga gikan kini nagpatambal sa Bantayan District Hospital tungod sa mga samad sa iyang kamot.

Nagduda ang kapolisan nga iya ang mga dugo nga nagpatak-patak  sa bintana ug gawas sa pinuy-anan sa biktima atol sa ilang pagsibat.

Walay laing nakitang motibo ang kapolisan sa maong krimen kundili mao ra gyud ang pagpanulis. (/EIM)(BANAT NEWS)