Silhig Festival sa Paknaan ipahigayon

CEBU, Philippines - Ang  pagpanggama og silhig sa taga barangay Paknaan sa dakbayan sa Mandaue maoy dugokan sa ipahigayon  nila  nga  Silhig Festival.

Kini  ilang sayawan  pinaagi  sa ilang  pinili  nga  mananayaw  aron ipahalipay  nila  ug  ihalad   kang Senyor Santo Niño  atol sa tinuig  nila  nga pista.

Ang pagpanggama og silhig nga lanot maoy nag-unang panginabuhi sa mga molupyo   sa Paknaan  nga  nakapalambo  sa ilang  panginabuhi .

Nakapaedukar  sila  sa ilang  mga  anak  ug  nakapamalit  og  mga  kabtangan  tungod  sa maong  panginabuhi.

Matud pa ni Paknaan Barangay Kapitan  Malaquias Soco   atol  sa  usa  ka press conference   karong Pebrero 3 adlaw nga Domingo  maoy tinuig nga pangilin   sa ilang  barangay.

Matud pa niya nga ang Silhig Festival karong tuiga  maoy ikaduhang tuig  sa  pagpahigayon  nila   niini.

Matud pa  niya  nga  ilang  gipaningkamotan nga  labi  pang  madanihon  ang  maong  pasundayag  aron malipay  si  Senyor  Santo  Niño  nga  maoy naghatag  kanila  og  kinabuhi  ug nagbendisyon  sa ilang  panginabuhi  nga  mao  ang  pagpanggama  og  silhig.

Si Kapitan  Soco miingon nga ang pito ka mga contingent nga ilang gihiusa  gikan sa mga purok ug sitio maoy mag-indigay   pinaagi  sa pagsayaw  sa karsada   ug  hukman  kun  kinsay  labing madanihon maoy  ikadeklarar  nga  mananaog.

Dugang pa niya nga makadawat og dagkong ganti ang matag contingent nga  maayong  mosayaw sa street dancing   ilabi  na  sa  showdown.

Ang makadaug  sa unang ganti makadawat og P25,000, ikaduha  P20, 000 ug P15,000 usab ang ikatulong ganti , samtang  makadawat usab og P10,000 ang matag contingent nga dili modaug.

Dugang madawat nga ganti mao ang P5,000 alang   sa modaug sa street dancing, best in andas ug  ang kagamhanan sa barangay mihatag usab og tag P12,000   sa  matag   contingent  isip ayuda sa ilang pagpangandam. (BANAT NEWS)