Delos Reyes wala mahulga

CEBU, Philippines - Ang negosyanteng si Johnny Delos Reyes (JVR) kinsa mikandidato sa pagka-mayor sa dakbayan sa Talisay atbang ni Kongresista Eduardo Gullas sa umaabot nga eleksiyon karong buwan sa Mayo nagkanayon nga wala siya mahulga.

Kahinumduman nga kataposang termino na karon ni Gullas sa Kongreso ug mikandidato kini karon isip mayor sa Talisay samtang ang apo niining si Gerald Anthony “Samsam” Gullas ang nagpapiling Kongresista sa unang distrito sa probinsiya.

Ang grupo ni Gullas ubos kini sa Alayon Party samtang si JVR ubos sa Liberal Party.

Si JVR nga nahinabi sa mga tigbalita kagahapon nagkanayon kini nga ang pagtuo sa ubang mga tawo nga layo kaayo siya og biya ni Gullas apan sa pagsuroy-suroy nila sa kabarangayan mainiton kaayo ang paghangop sa katawhan ngadto sa ilang grupo.

Matud niya nga makita nila ang reaksiyon sa mga tawo nga mangita og kabag-ohan sa pamunoan sa Talisay.

Ang kandidato sa pagka-mayor sa Talisay nagkanayon usab kini nga ang kontra karon sa iyang kaatbang dili siya kundili ang katawhan sa Talisay.

Si JVR midugang kini nga sukad pa kaniadto padayon siyang mihatag og tabang sa mga taga Talisay.

Kahinumduman nga si JVR midagan kini kaniadto isip mayor sa Talisay atbang ni Mayor Socrates Fernandez apan napildi kini.

Gawas niini midagan usab siya kaniadto isip board member sa unang distrito apan wala gihapon kini swerteha kaniadto.

Sa laing bahin, si Konsehal Romeo Villarante kinsa kaalyado ni JVR ug magpapiling bise mayor sa Talisay sa umaabot eleksiyon pares ni JVR nagkanayon kini nga wala usab siya mahulga sa iyang mga kaatbang.

Ang mga kaatbang ni Villarante mao ang incumbent mayor nga si Alan Bucao ug ang kanhi bise mayor sa Talisay nga si Aberdovey Belleza.

Si Villarante kinsa bayaw ni kanhi Bise Mayor Lani Abarquez nagkanayon kini nga “relax lang ta kay anyway ang mga tawo ra man gyu’y magbuot…nothing to lose if we will win so better nga maka-contribute ta”.

Matud ni Villarante nga kung mapildi man ugaling siya walay mawala niya apan iyang giklaro nga wala siya mahulga sa iyang mga kaatbang.

Matud usab ni Villarante nga sa iyang nakita maayo ang pagdawat sa mga Talisaynon kanila.

Samtang ang ilang kaalyadong konsehal nga si Val Ylanan nagkanayon kini nga ang tumong lang gyud nila mao ang pagserbisyo sa katawhan bisan kinsa pa ang molingkod nga mangulo sa siyudad.

Apan ang konsehal nagkanayon kini nga dakung kalipay nila kung unta sa umaabot nga eleksiyon mapili ang ilang grupo. (BANAT NEWS)