Minor nga “Mopatay” sa silingan napakgang

CEBU, Philippines - Usa ka minor de edad nga gidudahang sakop sa gang nga misulong sa silingan ang nadakpan ug nakuhaan og armas.

Nahibaw-an usab ang dautang plano pinaagi sa text message nga nabasahan sa mga polis gikan sa cellphone niini.

Nakuhaan og armas ang 17-anyos nga si Rolando (tinuod pangalan gipugngan) nga nadakpan sa kapolisan sa Brgy. Sentro dakbayan sa Mandaue sa milabay’ng hapon.

Ang suspek nga nagtingkagol na karon sa Police Station 1 sumala pa ni PO2 Dan Dadula unang gireklamo sa usa ka Johnrey Padin nga silingan niini nga kalit nga nasuko tungod kay nasaghiran sa ilang panagsugat sa agianan.

Sumala pa nga gisulong sa suspek ang biktima apan nakabantay si Padin nga dunay giluklok nga armas diha sa hawak si Rolando hinungdan nga mikaratel siya og dagan ug nagpatabang sa Station 1 sa Mandaue City Police Office.

Ang suspek naabtan sa kapolisan ug nadis-armahan sa iyang kalibre .38, sa pagsusi sa mga polis sa cellphone niini matud pa dunay text didto nga naghisgot kabahin sa pagpatay kang Padin.

Kasong paglapas sa Comelec gun ban ang ipasaka batok niini. (BANAT NEWS)