CEBU, Philippines - Duha ang angol sa pagpanunggab sa mga dakbayan sa Mandaue ug Sugbo sa miaging Domingo.
Ang mga biktima mao sila si Emma Ali, 40, minyo sa barangay Mantuyong, dakbayan sa Mandaue, ug Anthony Siatanan, 29, nga taga sitio Silangan, barangay Tejero, dakbayan sa Sugbo.
Si Ali giluba ni Mongaya Acob, hingkod ug bana sa iyang pag-umangkon samtang si Siatanan giluba sa iyang silingan nga si Rex Biker, 20.
Si Ali nalubaan sa mga alas 11:00 sa gabii niadtong Domingo human niya badlonga si Acob ug ang asawa niini nga nag-away sa maong higayon. Sa kasuko ni Acob sa maong pagpamadlong, giluba ang tiyan ni Ali, samtang si Siatanan gidunggab nianang alas 8:00 pa sa gabii niadto gihapong Domingo.
Kini human niya panilnga si Biker sa utang niining P6 sa softdrink nga giinom niini sa tindahan nga gibantayan ni Siatanan. Ang duha ka biktima pulos gihatud dayon sa tambalanan samtang ang mga miluba kanila pulos nakalayas ug maoy gipangita karon sa kapolisan. (BANAT NEWS)