2 ka Koreana gitulis naminghoy

CEBU, Philippines - Naminghoy ang  duha  ka  Koreana human  himulboli  sa  ilang  mga  cell phone   sa duha  ka  wala  hiilhing  lalaki  nga  armado  nga  nagsakay  og  motorsiklo  didto  sa dalan Sacris sa barangay Bakilid, dakbayan sa Mandaue sa miaging  gabii.

Ang mga biktima mao sila si Park Sun Mi ug Choi Sun Reni, pulos hingkod ug temporaryong nagpuyo sa  International  Academy   sa  A.S. Fortuna Street,  sa maong  dakbayan .

Si SPO2 Antolin Montecalvo sa Subangdaku Police Station  nga nahinabi sa Banat News miingon nga gikan pa ang mga biktima nga nagkuha sa ilang sapot nga gipalabadahan sa usa ka laundry shop nga nahimutang pipila ka metros ang gilay-on sa ilang gipuy-an.

Dugang pa niya nga dala  sa  mga  biktima  ang  duha  ka  bag  nga  puno  sa linabhan ug naglakaw pauli sa International Academy nga ilang gipuy-an.

Apan  sa  pag-abot  nila  sa ngitngit  ug  awaaw  nga  bahin  sa karsada  kalit  silang  gisakdapan   sa usa  ka motorsiklo  nga  gisakyan  sa duha  ka lalaki.

Dayon  mihunong  kini  sa  ilang  atubangan ug   ang  angkas  niini  maoy  nanaug dayong  lanit  sa iyang  armas  de fuego  uban  sa pahibawo  nga tulis.

Ang  mga  biktima  kinsa  nabalaka  sa ilang  kinabuhi  walay  laing  nahimo  gawas  sa  paghatag  sa  ilang  mga  cell phone  kay  wala  man  silay  dala  nga  kuwarta  sa maong  higayon.

Human  madawat  ang  maong  mga  butang, misirit  dayon  ang  mga  tulisan pahilayo  sa maong  lugar

Si SPO2 Montecalvo miingon nga dali nilang gisuhid  ang dapit nga nahitaboan  kuyog sa duha ka biktima apan napakyas sila sa pagkaplag sa mga tulisan.

Sa  pagkakaron  padayon pa kining  gipangita  sa kapolisan. (Romeo T.  Limpangog, Bong Soriano ug Gianelli Ann Cañete, USJR InternWC) (BANAT NEWS)