Shooting spree sa korte officially closed na— CCPO
CEBU, Philippines - Gikonsiderar karun sa kadagkuan sa kapolisan nga sulbad na ang kaso sa nahitabong pagpamusil diha sa sulod sa Palace of Justice sa milabay’ng semana nga mikalas og tulo ka kinabuhi ug miangol sa usa ka fiscal.
Ang hepe sa kapolisan sa dakbayan sa Sugbo Sr. Supt. Mariano Natuel Jr. mibutyag sa Banat News nga ila nang gikonsiderar nga ‘case closed’ ang kasong pagpamusil nga mikalas sa kinabuhi nilang Atty. Jubian Achas ug Dr. Rene Rafols ug sa suspetsadong si John Pope.
Matud pa ni Natuel nga bisan pa man og wala mapaubos sa awtopsiya ang patay’ng lawas ni Pope aduna silay lig-ong saksi aron makapamatuod nga nagpusil si Pope sa iyang ulo.
Ikaduha niini mao nga nagpositibo sa gunpowder ang tuong bahin sa tampihak ni Pope nga nagpamatuod nga siya nagpusil ug ikatulo mao nga adunay buhok sa nozzle sa armas nga gigamit pagpusil ni Pope sa iyang ulo.
Samtang gibutyag usab ni Natuel nga ang awtoridad sa Canada nagpadala usab og sulat nga ang lawas ni Pope nga i-cremate itugyan sa usa ka Iris Adiong nga taga Sagay, Negros Oriental.
Niadtong Domingo, gihatod na usab sa katapusang pahulayan sila si Achas ug Rafols sa managlahing sementeryo sa syudad sa Mandaue.
Samtang sa report sa Aksyon Bisaya News5, gibutyag sa igsuon ni Fiscal Ma. Theresa Casiño nga si Jojo nga gitangtang na ang life support sa iyang igsuon niadtong Sabado sa buntag ug orally taken na usab ang iyang mga tambal ug dili na intravenous kon gipaagi sa ugat.
Nagtuo sila nga nabalik og function ang lawas ni Casiño bisan padayon kining naa sa sulod sa intensive care unit, wala pa gihapon mahibaw-i kung tangtangon ang nag-ungot nga bala diha sa tangkugo niini. (EIM) (BANAT NEWS)
- Latest
