Duha gi-ambush patay

CEBU, Philippines - Duha ang patay  pagpang-ambush sa usa ka taytayan sa barangay Arpili sa lungsod sa Balamban niadtong Domingo sa alas 5:40 sa hapon.

Ang biktima nga patay diha-diha mao ang drayber sa motorsiklo nga si Eusenio Lugay, 39, taga barangay Biasong, Balamban nga usa ka barbero. Samtang ang laing biktima mao ang iyang angkas nga si Clifford Tan, 45,  taga barangay Sta. Cruz, Balamban.

Samtang ang duha ka mga lalaki nga nagsakay og motorsiklo nga giingong nag-atang nang daan sa maong lugar maoy gitumbok nga mi-ambush sa duha. Matud ni SPO1 Julius Obañana sa Balamban Police Station sa pakighinabi sa Banat News nagsakay og motorsiklo ang mga biktima gikan sa siyudad sa Toledo ug paingon na untang mamauli apan pag-abot sa maong lugar dapit sa taytayan gipamusil ang duha sa maong mga lalaki.

Human niini daling nanakay sa motor ang mga mamumuno ug mibiya sa maong dapit.

Ang mga biktima naigo sa lain-laing bahin sa lawas, si Lugay patay diha-diha samtang si Tan gidali paghatud lahos sa Vicente Sotto Memorial Medical Center apan nakabsan gihapon kini sa kinabuhi sumala pa sa kapolisan.

Ang mga polis nga niresponde sa krimen nakakuha og upat ka basiyo sa kalibre .45 nga bala ug usa ka deformed slug.  Sumala pa ni SPO1 Jose Villarino ang hepe sa Homicide Section sa kapolisan sa maong lungsod nga nakakuha sila og mga drug paraphernalia sa U-Box sa Honda XRM nga gimaneho ni Tan maong nagduda silang posibleng may kalambigitan sa ilegal drugs ang motibo sa pagpatay.

Ang kapulisan padayon pa sa ilang manhunt operation pag-ila ug pagsikop sa mga responsabli sa krimen. (/EIM) (BANAT NEWS)