Programa sa mga kabus giaprobahan ni PNoy

CEBU, Philippines - Giaprobahan na ni Presidente Benigno Aquino III ang National Driven Development Program (NCDDP)  nga suportado  usab  sa  mga sakop  sa hunta  sa National Economic Development Authority (NEDA).   Sumala pa ni  Simeon Remata III sa DSWD-7  nga ang NCDDP usa ka ang-ang sa Kapit-Bisig Laban sa Kahirapan Comprehensive and Integrated Delivery of Social Services (Kalahi-CIDSS) nga  usa sa programa sa nasudnong ahensya sa goberno nga mosulbad sa kakabos nga giimplementar  sa Department of Social Welfare and Development (DSWD).  

Matud  pa ni Remata nga ang NCDDP mogamit og Community-Driven Development (CDD) approach sa pagtubag sa kakabos  sa katawhan diin pinaagi niining maong estratehiya makahatag  og kadasig  sa mga ordinaryong tawo nga mamahimong aktibo sa pagsalmot sa  mga gimbuhaton sa  lokal nga panggobiyerno pinaagi sa pag-ila sa ilang kaugalingong panginahanglan sa komunidad, pagplano, pag-implementar ug pagmonitor og mga proyekto nga maoy tubag sa isyu bahin sa kakabos.  

Gipadayag ni Remata nga ang Kalahi-CIDSS sa pagkakaron  nag-alagad na sa 367 ka mga labing kabus nga munisipalidad sa 12 ka rehiyon diin kining maong gidaghanon mosaka pa ngadto sa 900 sa 16 ka rehiyon sulod ning tuiga.   Gitug-an ni Remata nga ang buhatan sa DSWD mianunsyo nga ang susamang programa gipahigayon usab ngadto sa Autonomous Region of Muslim Mindanao (ARMM) ug dugang 118 ka lungsod ang gipaabot nga -alagaran sa ARMM.     

Sa pagkakaron ang Kalahi-CIDSS sa Central Visayas nag-alagad sa 25 ka mga munisipalidad sa probinsya sa Bohol, Negros Oriental, ug Siquijor diin subay sa paglig-on sa NCDDP sa  miaging semana ang gidaghanon sa mga benepisyaryo sa mga kalungsoran sa rehiyon 7 misaka ngadto sa dugang pang 5 nga naglibot sa tanang isla sa probinsya lakip na ang probinsya sa Sugbo.  

Gibutyag ni Remata nga samtang ang DSWD mao ang ahensyang nangulo sa NCDDP, nakig-alayon usab kini sa ubang ahensya sama sa Department of Agrarian Reform (DAR), Department of Agriculture (DA), Department of Education (DepEd), Department of Energy (DOE), Department of Environment and Natural Resources (DENR), Department of Labor and Employment (DOLE), Department of Health (DOH), Department of Labor and Employment (DOLE), Department of the Interior and Local Government (DILG), National Commission on Indigenous Peoples (NCIP), National Economic and Development Authority (NEDA), Department of Budget and Management (DBM),  ug ang National Anti-Poverty Commission (NAPC).

Si Secretary Corazon “Dinky” Soliman mapasalamaton kaayo sa paglig-on sa NCDDP nga iyang giila nga bunga  kini  sa   dugang kakugi  nga  gipakita sa mga  tawo  nga anaa  sa maong  ahensya  nga iyang  gipangunahan. (BANAT NEWS)