Gikang nanuyop gipusil kritikal

CEBU, Philippines - Kritikal ang kahimtang sa usa sa duha ka mga drug addict dihang gipamusil kini sa duha ka wala  hiilhing kriminal  nga  nagsakay og motorsiklo didto sa Poblacion lungsod sa Compostela niadtong Sabado sa alas 1:45 sa buntag.

Ang mga biktima mao si Edmar Neri alyas Bodoy, hingkod, ulitawo ug molupyo sa barangay Cabadiangan ug ang kauban niini nga  iyang  silingan  nga  naila lang sa  alyas  nga  Waway. Si PO3 Dino Caputol sa Compostela Police  Station  mibutyag  sa Banat News nga gikan  pa  sa pot session  ang  mga biktima ug pag-abot sa maong lugar mihunong sila  ug nanganaog  sa ilang  motor.

Apan kalit  lang  miabot  ang usa  ka  motorsiklo  nga  gisakyan  sa duha  ka wala  hiilhing  tawo  nga  nagsul-ob  og  sirado  kaayong  helmet ug  pareho  usab  nga nag-jacket  ug  sa walay  estorya  ang angkas  niini   milanit  dayon  sa iyang  armas   ug  gitirohan  dayon  sa makadaghang  higayon  ang  mga  biktima. Apan  ang  nasabak  pag-ayo    mao  si Bodoy  kay  abtik man  kaayong mikabad  og dagan  si Waway.

Sa pagtuo  sa maong  mga kriminal  nga  patay  na si Bodoy  dihang  nalup-og  na  kini  sa yuta milayas  dayon  sila  ug  gibiyaan  ang  biktima  kansang  dugo  sa  lawas  nagbuhagay  gikan  sa tulo  ka  mga samad  niini.

Ang  mga  nakasaksi  sa maong  hitabo  maoy  misakwat  sa biktima  ug  gihatud  ngadto  sa Vicente Sotto Memorial Medical Center (VSMMC)  sa dakbayan  sa Sugbo ubos s a kritikal nga kahimtang.

Ang kapolisan padayon  sa ilang  imbistigasyun pag-ila  ug  pagtumbok sa mga  kriminal ug  usa  sa  mga anggulo  nga  ilang  gisusi  mao  ang bahin  sa pagkuyanap  sa gidiling  drugas  sa maong  lugar ug  ang  mga  biktima  gidudahang  namago  sa gisuyop  nilang  shabu.

 (BANAT NEWS)