UP Cebu MBA program buksan

CEBU, Philippines - Buksan  sa University of the Philippines (UP) Cebu ang ilang Business Management  program  alang  sa tuig tingtungha 2013-2014.

Matud  pa  ni Professor   Ernesto G,  Yap, chairperson  sa Business Management Cluster, sa UP  Cebu,  nga  manawat  na  sila  karon  og  mga  aplikante   alang  ning  maong programa.

Miingon  siya  nga  kining maong  curriculum  ipahitakdo  sa  gipatuman  usab didto  sa UP Diliman MBA program,  diin  mohatag  og  hustong  sumbanan  alang  sa  nagkalainlaing  subject  nga  may  labot  sa  management  nga  kurso.

 Midugang  si Yap  nga  ang  mga  magtutudlo  nga  ilang  padumalahon  niining  maong  programa  pulos   usab mga  pinili  ug  puno  sa kabatid  ug  kahanas  kinsa  pulos  gradwado  sa  inilang  mga  eskuylahan  sa nasud.

Bisan  ang  mga  estudyante  niining  maong  curriculum,  pilion  usab  sumala  pa  ni Yap.

Busa  gipahinumdom  niya    nga alang  sa mga  Sugboanong  estudyante  nga  buot  mokiha ning  maong  kurso,  angay  mosalmot  sa  entrance  examination  nga  ipahigayon  unya  sa Pebrero 23, 2013 didto  sa A.S. Building  sa UP    Cebu  sa alas 7:30 –ngadto  sa alas 12:00  sa buntag.

Ang  mga  aplikante kinahanglang  mopresentar   sa ilang Transcript of Records alang sa evaluation pinaagi  sa electronic files sa [email protected] o kaha  pinaagi  sa fax no.032-2335634  o  kaha  personal  nilang  itunol  ang  ilang  porma ngadto sa UP Cebu Business Management Office  sa UP Lahug, Cebu City.

Matud  pa  ni Yap  nga   kining  maong  kurso dako  kaayo    og  ikatabang   sa  mga  estudyante  nga taga    Cebu. (BANAT NEWS)