Flu bantayanan ang pagkuyanap

CEBU, Philippines - Ang buhatang  rehiyonal  sa Department of Health (DOH)7 mipalanog  sa  awhag  gikan  sa ilang  buhatan  sa kaulohan kalabot  sa pagkuyanap  karon sa  sakit  nga flu  sa nagkalainlaing  dapit  sa nasud.

Usa  sa hinungdan  niini mao  ang  kabugnaw  sa panahon didto  sa gawas  sa nasud  busa  nag-una  sa labing  daghan  og  mga nakasinati  sa flu  mao  ang  taga  Estados  Unidos sa America. Si Dr. Asuncion Anden sa DOH 7  nagkanayon  nga wala’y   exempted  sa maong  sakit  ilabi  na  kun  magkompiyansa  ang tawo.

Una  nga  dili  makalikay  niini  mao  kadtong  hinay  og  resistensya  kay apyugon  ang  lawas  ug  kuwang  sa sustansya.

Ikaduha  mao  kadtong  dili  mag-amping  sa panlihoklihok  sa lawas  nga magpasinguwan  nga  dili  magpayong  gikan  sa pagbuwad  sa  init.

Sayo  niini  mipasidaan si Health Secretary Enrique Ona  nga bisan dili angay kahadlokan ang influenza, dili usab angay mo kompiyansa ang  matag  usa tungod kay posibleng ikamatay kini ilabi na kun mapasagdan.

Usa  sa labing  maapektohan  sa dili  maayong epekto  sa flu  mao  kadtong   mga babayeng  magsabak  ug  ang mga bata.  Pipila sa angay nga bantayan karong  panahona  mao ang hilanat nga may kaubang, pagkapagaw  ug ubo.

Ang Influenza usa ka viral nga sakit nga mahimong mokuyanap ug makatakod sa uban pinaagi sa droplets  o  pinisik  sa sip-on  sa ubo kun adunay giubo o bisan nakig-estorya lamang ang  tawo nga duol  kaayo  sa usa ka giubo.

Matud pa ni Ona nga kuyaw gayud ang influenza sa mga bata, buntis, tigulang ug adunay mga sakit nga sama sa heart, kidney, o lung disease tungod kay mas mohinay ang ilang resistensya nga mahimong mauli sa komplikasyon sa pneumonia. 

 Apan gibutyag ni Ona nga makatabang ang flu vaccine ilabi na sa mga indibidwal nga  hinay og immune system. (BANAT NEWS)