Motor vs. mini bus; 1 patay 1 angol

CEBU, Philippines - Namatay  diha-diha  ang drayber sa motorsiklo samtang talandugon  usab  ang kahimtang sa angkas  niini human  modasmag ang ilang sakyanan sa mini bus nga pasaheroan   didto  sa national highway sa barangay Pitogo, lungsod sa Consolacion sa miaging adlaw.

Ang namatay mao si Ian Bataluna Cohitmingaw, 23, ulitawo, nga taga barangay Panangban, lungsod sa Compostela, samtang  ang  anaa  sa talandugong  kahimtang  mao si Rocky Booc, 22, ulitawo, nga taga lungsod sa Medellin, Cebu  nga  maoy  nag-backride  ni Cohitmingaw. 

Si Aurio Labrador, hingkod,  nga taga   barangay Binaliw sa dakbayan sa Danao maoy nagmaneho  sa  mini bus nga gidasmagan sa motorsiklo nga gisakyan sa mga biktima.

Si PO1 Alvin Velasquez, imbestigador sa traffic section  sa kapolisan sa maong lungsod nga nahinabi sa Banat News  miingon  nga ang mga biktima gikan pa nga nanambong og disco  atol  sa pista  sa ilang  dapit.

Unya  wala  na kini  makatulog  kay  mutambong  pa  man  sa   ilang trabaho  sa usa ka pabrika sa dakbayan sa Mandaue.

Matud pa ni PO1 Velasquez nga segun  sa sugilon  sa  mga nakasaksi  sa maong  hitabo  nga sa wala  pa  modasmag  ang  sakyanan  sa mga  biktima sa mini bus,  ilang  nakita  ang  pag-ikis-ikis niini  og  dagan  sa karsada apan   didto    mosubay  sa pikas  lane nga  maoy  giagian  sa iyang  gikasugat  nga  sakyanan.

Bisan  si Labrador  nga maoy  drayber  sa mini  bus  nagkanayon  nga  iya  kining  gisirbatohan  sa layo  pa   kay  misubay  naman  kini  sa iyang  agianan  nga lane.

Apan  matud  pa  ni  Labrador  nga  wala  gyud kuno  patuo    si Cohitmingaw busa  gipahunong  niya  ang  iyang   mini  bus  nga  iyang  gimaneho.

Apan  bisan  naghunong  na siya  gidasmagan  lang  gihapon  ang  iyang  sakyanan  sa motorsiklo  sa mga  biktima.

Gumikan sa kakusog sa  pagdasmag    si Cohitmingaw ug  si Booc  nangalagpot   ug  mitugpa  sa sementadong  karsada.

Ang  duha  pulos  nakuyapan  busa  gikuha  kini  og  ambulansya  apan  sa pag-abot  niini  didto  sa Eversely Child Sanitarium Hospital sa barangay Jagobiao, dakbayan sa Mandaue  si Cohitmingaw  gideklarar sa mga doktor nga dead on arrival, samtang  si Booc kritikal  ang  kahimtang.

Ang  drayber  sa mini bus mitahan  usab  sa iyang  kaugalingon  sa kapolisan. (BANAT NEWS)