Publiko gi-warningan bugas ipadaginot

CEBU, Philippines - Subling  gipasidan-an  sa kagamhanan  ang  publiko  sa pagdaginot  sa bugas humay  nga  maoy  nag-unang  panginahanglan  sa lawas  sa tawo.

Ang maong  pasidaan  gipalanog  ni Regional  Executive  Director  Angel Enriquez  sa   Department of Agriculturfe (DA) 7  atol  sa pormal  nga pagbukas  sa National Year of Rice (NYR) didto  sa Bohol  Cultural Center  sa syudad  sa Tagbilaran, lalawigan  sa  Bohol sa miaging  Miyerkules.

Ang maong  kalihokan  gitambongan sa dul-ang  400 ka  mga  mag-uuma  sa maong lalawigan  ug  sa  mga  estudyante  sa agrikultura  nga  gikan  sa nagkalainlaing  tulunghaan sa nasud.

Si Enriquez  sa  iyang  pagpamulong,  mipasalig  nga  dili na angay  mabalaka  ang  katawhan  tungod  kay  gipiyal  na  sa gobiyerno  ang  pagkaon  sa 95 milyones  nga  mga Filipino  gikan  sa  kaugalingong produksyon  sa humay  dinhi  sa nasud busa  sugod  karong  tuiga  dili  na mangompra  og  bugas  humay  ang  kagamhanan  didto  sa gawas  sa nasud.

Gipahayag  ni Enriquez  nga  ang  Bohol  dako kaayo  og  papel  niining kaabunda  og  bugas  humay sa nasud  karon    nga  molahutay  hangtud  sa umaabot  pang  mga katuigan  tungod  kay  giatiman  man  usab  sa kagamhanan  ang  mga  mag-uuma, ang  ilang  mga  uma  ug  ang  gamitunon  nila  sa panguma.

“We are very confident that we will achieve rice self sufficiency if  we have the right management of  consumption”, matud  pa  ni  Enriquez.

Gipasalig  usab  sa DA7 regional director   nga  aron  nga  madaginot  ang  bugas  ug  dili  ta kuwangon,  ayuhon  ang  pagkonsumo  niini  ug  kining maong  kampanya  ipadayon  sa DA  aron  makakat-on  ang tanan  sa pagdaginot  sa  bugas  ug  dili  mag-usik-usik  niini.

Pinaagi  sa hustong  pag-atiman  sa pagkaon  sa lamesa  dili  mausik  ang  mga  linuto  nga pagkaon  kun  dumalahon  lang  sa mga  tagbalay  ang  nga  bahaw  nga  pagkaon  aron  mapuslan  gihapon  ug  dili  kay  ideretso nalang  og  salibay ngadto  sa basura, sumala  ni  Enriquez.

Miingon  si Enriquez  nga  ang  pagsabwag  og  tukmang  impormasyon  kalabot  niini  maoy  buhaton  sa DA  aron may sumbanan  ang  tanan  bahin  sa hustong  paggamit  sa bugas.

Kahinumdoman  nga  ubos  sa Proclamation  No. 494  gitakda ni  Presidente  Benigno Aquino III  ang  tuig 2013  isip  National Year of Rice. Ang tema  sa  kalihokan  sa paglusad  sa NYR  mao  ang  “Sapat na Bigas Kaya ng Pinas”. (WC)(BANAT NEWS)