Paglimiti sa political ads gisaway

CEBU, Philippines - Gisaway  sa usa ka  negosyante   ang  pamaagi  sa Commission  on  Elections (COMELEC) paglimiti  sa  mga  kandidato  sa  ilang   airtime  sa radio  ug television  alang   sa piniliay sa  Mayo  niining  tuiga.

Si magpapatigayon  Glenn Soco nagkanayon  nga  sa paglimiti sa   airtime  sa  mga kandidato lupigon  ang  mga  bag-ong  kandidato  sa  mga  incumbent  kay  mas popular  man  sila  kay  nagsilbi  naman  sila  sa katawhan  itandi  niadtong  mga  kandidato  nga  bag-o  lang  misalta sa  politika.

Busa  si   Soco nga  mokandidato  pagka-bise  gobernador  sa lalawigan  sa Sugbo  karong  umaabot  nga  piniliay miawhag  sa   mga  kadagkoan sa Comelec   nga tun-an  niini  pag-ayo  ang  sistema  nga  dili mabintahaan  sa  mga  karaang  politiko  ang  bag-ong  mokandidato sa natad  sa political  ads  niini.

Kay  kun  mao  kini  mahitabo  seguradong  mangikog  ug mabonbon  sa  umaabot  nga  election ang  mga bag-ong  mokandidato  kay  sa karaang  politiko. Ang Comelec Resolution No. 9615  nagmando sa tanan nga kandidato sa paglimiti   sa ilang  oras sa  political  ads  sa radyo ug telebisyon sa ilang pagpaila sa ilang tagsa-tagsa ka mga kandidatura sa panahon sa ilang kampanya.

Sa maong Comelec Resolution  gitugotan lamang og  120 minutos ang airtime sa political ads  sa television  ug 180 minutos usab ang alang sa radio  sa tanan nga mga network niini.  Ang mga local nga kandidato gitugotan  og 60 minutos   nga airtime    nila  sa TV ug 90 minutos usab ang sa radyo.

Si Comelec Chairman Sixto Brillantes  Jr miingon nga ang mga kandidato nga magpa-interbiyu sa radio ug telebisyon kinahanglan  nga mangayo daan og approval sa ilang buhatan. (WC)(BANAT NEWS)