Pension house gitulis sa ilang guest
CEBU, Philippines - Usa ka pension house sa dalan Sanciangko sa barangay Kalubihan sa siyudad sa Sugbo ang gitulis sa usa sa ilang mga guest ug nakuha ang P12,000 nga kinitaan diha sa kahera niadtong Biyernes sa gabii.
Sumala pa ni PO1 Kenneth John Gaquit sa Theft and Robbery Section sa Cebu City Police Office, ang management sa Citiview Pension House mitumbok nga usa ka Radney Ilustrisimo ang mitulis kanila.
Si Ilustrisimo matud pa regular na nila nga customer, ug niadto pang Lunes kauban sa usa ka gituohang kapuyo niini ug anak mi-check-in sa pension house.
Matud pa nga alas-8 pagka-Biyernes sa gabii, nanaog ang suspek ug niduol sa front desk aron palimpyohan na ang iyang kwarto kay mo-check out na siya kay ang iyang pamilya miuna na og gawas.
Dihang misaka na ang roomboy nga maoy kauban sa kaherang si Alice Rondina niadtong tungora gikatahong kalit nga mideklarar og tulis ang suspek.
Si Rondina, nag-inventory sa kwarta niadtong tungora ug sa iyang kahadlok nga dunggabon wala na siya makasinggit pa aron mangayo og tabang, matud pa gikuha sa suspek ang P12,200 nga kinitaan sa maong pension house.
Ang suspek nisakay dayon og PUJ ug nakasibat sa maong dapit, matud pa kang Gaquit. Dugang pa ni Gaquit nga ang maong pagpanghold-up nakuhaan og video footage sa security camera nga naka-install sulod sa maong pension house.
Padayon na karong gipangita ang maong suspek, kinsa mihatag lang og address nga Cebu City. (EIM) (BANAT NEWS)
- Latest
