Iladong tulisan sa San Fernando tiklo

CEBU, Philippines - Nadakpan sa kapolisan ang  usa  ka  bayong-bayong  kinsa ilado  sa pagka-tulisan  sa lungsod sa San Fernando  nga nagdala og engram  didto sa barangay Pitalo  sa maong  lungsod niadtong Huwebes  sa gabii.

Ang nadakpan   usa  ka 16-anyos  nga taga Sitio Locnay barangay South Poblacion, San Fernando.

Nasakmit  sa kapolisan  gikan   sa suspek ang usa ka engram  ug  usa ka posporo nga puno sa pinaugang dahun sa marijuana.

Si PO2 Jose Claire Balagtiosa sa San Fernando Police Station mitug-an  sa Banat News   nga   nagpatrolya sila si SPO1 Jose Yamasaki Repompo ug mga kauban sakay sa patrol car  sa maong  higayon   dihang  pag-abot nila sa  maong  lugar nasigpatan nila ang suspek nga nagbarug- barog daplin sa karsada nga nagbitbit  og  engram.

Ila  dayon  kining gihunongan, ug dihang nakabantay ang suspek, misutoy  kini  og  dagan   hinungdan nga ila  kining  gigukod   hangtud  nga ila kining  naliyokan busa  mitahan  nalang  kini  sa iyang  kaugalingon.

Dihang gikuha  sa mga polis ang engram, wala na  kini magazine  ug  gituohan  sa kapolisan  nga gituyo  kini  pagsalibay  o kaha natagak atol sa ginukdanay , apan   ang  usa ka   kaha sa posporo  nga puno  usab sa pinaugang  dahon  sa marijuana uban  usab  nga  gisakmit  sa kapolisan.

Gipaslak  dayon  kini   sa  prisohan  ug  pipila  sa mga  nabiktima  sa tulis  nga  misil-ing  sa suspek   mitumbok  nga  mao  kini  mitulis  kanila. (/WC) (BANAT NEWS)