Driver gitusak sa bala patay

CEBU, Philippines - Natusak sa mga bala  ang  lawas  sa  usa ka drayber  sa traysikad  kinsa gipusil-patay  sa  wala  hiilhing kriminal  didto sa  sitio San Antonio sa barangay Guinsay, dakbayan sa Danao  sa miaging hapon.

 Ang  biktima mao si Christopher Perez, 26 ,  nga nagpuyo sa maong dapit, ug  usa  ka drayber  sa traysikad.    

Si SPO2 Rocelo Campo sa kapolisan sa maong dakbayan nga nahinabi sa Banat News miingon nga gikan pa nga namasahero ang biktima sa gimaneho niining traysikad.

Padulong na unta  kini   sa ilang  balay  dihang  pag-abot  niini  sa maong dapit, kalit  lang  mihunong  ang  usa  ka  motorsiklo  sa  iyang  palibot dayon  wala’y daghang  estorya    gipusil  niini  ang   bukton, liog  ug  ulo  sa  biktima  nga maoy  hinungdan  sa hinanali  niining     kamatayon.

Human sa maong pagpamusil dali usab nga mipahilayo ang wala hiilhing lalaki   sakay  sa  iyang  motorsiklo.

Samtang  ang  biktima  gisakwat  sa  mga  nakasaksi  ug  gihatud  ngadto  sa  Danao Provincial Hospital apan gideklarar kini sa mga doktor nga dead on arrival.

Si SPO2 Campo miingon nga dili pa nila matataw ang hinungdan sa maong pagpamusil sanglit sa pasiuna nilang pakisusi   sa maong  hitabo, ilang nasayran  nga walay  kontra  sa  mga  silingan  ang  biktima.

Padayon  pang  gipangita  sa kapolisan  ang  kriminal. (/WC) (BANAT NEWS)