Nadakin-as sud sa balay patay

CEBU, Philippines -  Patay na nga nadiskubrehan ang usa ka 58-anyos nga babaye nga gituohang aksidente nga nadakin-as sa sawog ug nadakdak ang ulo sa sulod sa ilang panimalay sa sitio Upper sa barangay Labogon sa dakbayan sa Mandaue.

Si PO2  Richard Ares sa kapolisan sa Presinto 3  sa Mandaue City  Police Office (MCPO)  miila sa namatay nga mao si Patricia Soco.

Matud pa ni Ares nga ang anak sa namatay nga si Arnold Soco maoy nakadiskubre sa iyang inahan nga nagbuy-od na sa sawog sa ilang panimalay nga walay kinabuhi.

Dugang pa ni Ares base sa nahipos nilang kasayuran gikan sa mga silingan nga ang namatay katapusan nilang nasigpatan nga buhi sa miaging Enero 22 ug hangtod sa pagkasunod adlaw wala na kini nila makita nga migawas.

Sa pasiunang pakisusi walay nakitang dunay foul play sa kamatayon sa ginang apan sa gihapon ilang gisugyot ngadto sa mga sakop sa pamilya sa pagpa-ubos sa autopsy sa patay’ng lawas sa pagsuta sa hinungdan gyud sa kamatayon niini.  (BANAT NEWS)