“Akyat Bahay” gidemalas natanggong sa atop

CEBU, Philippines -  Gidemalas ang usa ka gipasanginlang kawatan human kini matanggong sa atop sa balay nga iyang gisuwayan unta og lungkab diha sa Cabreros Street, Barangay Basak-San Nicolas Miyerkules sa gabii.

Ang suspek mao si Arnold Sabello, 23,  kinsa giingong misuway unta sa paglungkab sa balay sa iya rang iyaan nga si Agnes Sabello.

Sa imbestigasyon nga gipahigayon sa Mambaling Police Station, gisuwayan unta og kawat sa suspek ang balor P25,000 nga mga home appliances sa iyaan  sama sa aircondition unit, gas range, ug computer monitor.

Matud pa ni Agnes, walay tawo adtong tungora sa iyang balay, ang suspek nagpuyo ra usab duol sa iyang balay.

Daan nang namatikdan sa biktima nga nagkaanam og kahanaw ang iyang mga kabtangan sa iyang panimalay ug nagduda na silang daan nga ang suspek maoy responsable niini.

Mga alas-7 nianang gabii sa Miyerkules, nisulod na usab ang suspek sa balay sa biktima pinaagi sa pagguba sa lock sa main door, wala kini makabantay nga nasulod na kini sa laang, apan pag-abot sa mga polis mikatkat kini sa atop ug wala na hinuon makadagan pa. (BANAT NEWS)