Priso nakonsensiya miangkon sa kalambigitan pagpatay sa bise mayor

CEBU, Philippines -  Usa ka priso ang mi-angkong usa siya sa mga suspek sa pagpatay sa bise mayor sa Mabusao nga si Vice Mayor Abel Martinez niadtong Mayo 4 sa nakalabay nga tuig apan gitudlo niya ang usa ka higalang usa ka military intelligence officer ug usa ka mayoralty candidate nga iyang kakunsabo sa maong krimen.

Ang bilanggo nga mi-angkon tungod kay nakonsensiya mao si Roger “Ian” Loredo, kinsa kasamtangang napriso sa Bureau of Jail Management and Penology (BJMP) sa Pototan, Iloilo. Ang iyang pag-angkon gibutang sa iyang affidavit nga penetsahan niadtong Disyembre 20, 2012.

“He was very remorseful. Sabi niya, kung mamatay man siya, at least nakatulong siya sa paglabas ng katotohanan,” matud pang Sr. Supt. Domingo Cabillan, ang Capiz Police chief.

Matud pa ni Loredo sa iyang affidavit mayoralty candidate sa Mambusao ang mastermind sa pagpapatay kang Martinez ug mibayad kanila og P150,000. Lakip sa ginganlan ni Loredo ang usa ka staff sergeant sa 3rd Infantry Division nga maoy mi-kontak kanila aron patyon si Martinez.

Si Loredo maoy driver sa motorsiklo samtang ang triggerman nga iya ra usab higala mao si Gilbie Principe. Si Principe namatay human naunay sa iyang granada niadtong Oktubre 13, 2012 sa del Carmen St. Jaro, Iloilo City dihang gigukod sa kapolisan tungod sa paglikay niini sa police checkpoint.

Si Loredo naputlan usab og kamot  niadtong Hulyo 15, 2012 dihang naunay gihapon sa iyang granada, tungod niini nadakpan siya sa mga polis ug maoy naka-ingon sa iyang pagka-priso. Matud pa sa mga polis labayon unta og granada ni Loredo ang balay sa silingan niadtong tungora apan tungod sa nadunggan niyang hilak sa bata gikan sa maong balay wala niya padayona ang paglabay sa granada apan nibuto kini sa iyang kamot.

Matud pa nga ang pag-angkon ni Loredo og kalambigitan sa kamatayon ni Martinez nagpalig-on sa mga impormasyong ilaha nang nakuha ug nakapalig-on kini sa kasong ilang ipasaka. Si Chief Supt. Agrimero Cruz, director sa Police Regional Office-6 miingon nga ilahang paninguhaon nga mapailawom sa witness protection program si Loredo. (/EIM) (BANAT NEWS)