USS Guardian nabuslot na

CEBU, Philippines -  Dako na ang na-damage sa US Navy minesweeper nga nasangad sa Tubbataha Reef niadto pang nakalabay nga semana sumala pa sa usa ka US Navy official.

Ang USS Guardian matud pa nasudlan na og tubig sa dagat, ang Pilipinas ug ang mga awtoridad sa Amerika nagkarakara karon sa paghimo og pamaagi aron makuha ang 68-metros nga barko gikan sa kabatohan.

Ang Tubbataha Reef gideklarar sa  UNESCO World Heritage Site nga protektadong dapit. Sumala pa sa report sa GMA News Online, ang operasyon sa pagsuway og kuha sa USS Guardian malisod tungod sa hanging amihan nga nagdala og dagkong balod.

Giplanohan nga usa ka mas dakong barko nga dunay crane ang mo-alsa sa USS Guardian palayo sa Tubbataha, una unta nga plano mao ang pagbungkag sa maong barko apan daghang problema nga nakita kung kini buhaton.

Si US Navy Rear Admiral Thomas Carney, ang commander sa Logistics Group Western Pacific miingon nga daghan na og buslot ang maong barko ug daghan nang tubig nga nakasulod niini. Sa pagkakaron kadaghanan sa crew niini ang gipakanaog tungod sa peligro.

Usa sa unahon og kuha sa mga salvage teams ang 57,000 liters (15,000 US gallons) nga fuel sa maong barko nga posibleng magbunga og polusyon kun mayabo sa dagat.( /EIM)