Salvage 1 patay 1 angol

CEBU, Philippines - Patay ang usa ka gwardiya, samtang kritikal  usab  ang kauban niini  dihang gi-salvage sila sa upat ka armadong mga tawo didto sa  kamanggahan sa Sitio Lutsa, barangay Caputatan Sur, sa lungsod sa Medillen  kagahapon  sa alas  5:00 sa hapon.

Ang namatay  kansang  lawas nabulit  sa mga  bala  mao si Rodulfo Misa, 41, ulitawo apan  adunay kapuyo, nagpuyo sa Sitio Flores, barangay Malbago lungsod sa Daanbantayan, ug usa ka security guard  sa dakbayan  sa Sugbo.

Samtang ang laing biktima nga anaa sa talandugong kahimtang   mao si Marvin Ostia, 45,  nga silingan  ra usab ni Misa. 

Si PO2 Roselito Ortega sa Medillen Police Station  mibutyag  sa  Banat News    nga nasayran  nila  ang  hitabo  gikan  sa taho  sa  usa ka Joel Duan, 33, taga Sitio Ylaya, barangay  Curva,  Medillen kinsa mipahibawo  kanila  kalabot  sa  nasigpatan  niining  usa  ka  tawo  nga nagkadugo  ang  lawas  nga nagbuy-od  sa karsada  nga nagginhawa  pa. Matud  pa  ni PO2 Ortega  nga  dihang  giparespondihan  niya  sa iyang  mga  sakop, nakit-an niini ang laing biktima nga si Misa sa kasagbutan, mga 30 metros gikan sa karsada nga patay na ug naputos sa pinusilan ang kalawasan.

Matud ni PO2 Ortega   nga  sa  ilang imbistigasyon  sa kapuyo ni Misa nga si Elena Matus, hingkod, nga nianang  Martes sa  gabii nanayaw  sila  og disco  didto sa barangay Malbago kauban ni Ostia ug nianang mga 1:45 sa kadlawon nananghid sila si Misa ug Ostia nga manglakaw  og kadali.

Gisakyan  nila ang motorsiklo ni Ostia  paingon sa barangay Tindog,  Medillen apan pag-abot nila sa outpost sa barangay Curva  mibuto ang ligid sa ilang motor hinungdan nga mihunong sila  ug gibilin ang motor sa outpost, ug   naglakaw nalang kini paingon sa barangay Tindog.

Apan sa ilang pag-abot  sa eskina sa sementeryo sa barangay Canhabagat naagi-an  sila og  usa  ka awto,  ug gihunongan sila  niini  dayon giti-onan  og  armas de fuego  sa upat ka tawong  armado  nga nagsakay  sa maong  kotse  ug dayon  gipugos  sila   sa pagpasakay, ug  gidala  sila  ngadto   sa Sitio Lutsa sa barangay Caputatan Sur.

Matud pa, gipakanaug sila  didto ug dayon gipamusil  sila   ug  dihang nakita  nga  patay na sila,  gibiyaan  kini sa mga kriminal nga wala magtuo  nga  nabinlan  pa og  kinabuhi  si  Ostia.

Mikamang si Ostia    ngadto sa karsada  hinungdan  nga nakit-an  siya  ni Duan nianang  pagkabuntag na.

Ang kapolisan  nakapunit  og  9 ka kabhang sa bala  sa  kalibre .45  nga pistola  sa dapit  nga  nahitaboan.

Ang biktima nga si Ostia daling gihatud  ngadto sa Verallo District Hospital sa Bogo City apan gi-transfer dayun kini sa tambalanan   sa dakbayan sa Sugbo  samtang  gipa-autopsy  pa  usab  ang  lawas  patay  ni Misa.

Ang kapolisan padayon pa sa ilang imbistigasyon sa maong  hitabo sa pag-ila sa mga kriminal ug  sa   motibo sa maong  kremin. (/WC)(BANAT NEWS)