Bag-ong opisina sa Register of Deeds gibuksan

CEBU, Philippines - Bukas na alang  sa publiko  ang  bag-ong buhatan sa Register of Deeds nga nahimutang sa kilid nga bahin sa Mandaue City Sports and Cultural  Complex sa sitio Tribunal sa barangay Centro sa maong dakbayan.

Ang maong buhatan  didto  kaniadto mahimutang sa kilid  sa usa ka fastfood chain sa dalan Highway Seno sa maong dakbayan.

Si Atty.  Reynaldo Mayo sa register of deeds nga nahinabi sa mga tigbalita miingon nga dugay na sila nga nagpangita og lugar nga ilang kabutangan sa ilang buhatan.

Dugang pa niya nga una nilang giplanohan  mao   unta ang kilid  sa City Tourism Office sa atubangan sa City Hall apan nalantawan  nila   ang daghang panginahanglan  ug  sagkaon  kaayo  kun  adto  nila  ibutang  ang  maong buhatan   busa  wala   sila  modayon  didto.

Dihang  gitanyag ni Mayor Jonas Cortes  ang lugar nga  ilang nahimutangan karon   ila  dayon  kining  gidawat  kay una  sa tanan  sayon  ra sa publiko  ang  pag-anha  sa maong  lugar.

Gitataw niya nga   hamugaway  kaayo  ang maong   dapit  nga ilang nahimutangan   karon  lahi  sa   karaan  nilang  opisina  nga  hagip-ot  kaayo  ug maglisod sila sa  paglihok-lihok  tungod  sa kaapiki  niini.

Sa pagkakaron  luag  na  usab  kaayo alang  sa magbubuhis  ang  pagduaw  sa ilang  bag-ong  opisina. –(BANAT NEWS)