Gipitsikorno nawong ug ngabil tata

CEBU, Philippines - Natata  ang  nawong  ug ngabil  sa usa ka  hubog  human  kini  sumbaga  gamit  ang  pitsikorno  sa  laing  hubog   sulod  sa   Mitz BBQ and Videoke Hauz sa Brgy. Maguikay, dakbayan sa Mandaue   sa  milabay’ng gabii.

Ang   biktima  mao  si Jorge Estorte, 44, tag-iya  og  tindahan  sa  barangay  Casuntingan sa maong  dakbayan  samtang  ang suspetsado  mao     si Juvito Tano, 23,   nga  taga Ibabao -Estancia sa maong dakbayan.

Si SPO1 Dexter Martin  sa Station 4 sa Mandaue City  Police Station  mibutyag  nga  ang suspetsado  uban  sa mga  higala  niini  nag-inom  sulod  sa nahisgutang  videokehan  diin  si  Estorte  nagkalingaw  og  kanta .

Apan  matud  pa ni SPO1 Martin  dihang  mokanta  unta  ang  suspetsado, wala  ihatag  sa  biktima    ang  mikropono  hinungdan  nga  nag-inilogay  sila  niini.

Unya  ang  suspetsado  nga  gibati  na  sa hilabihang  kapungot, milanit  sa iyang pitsikorno  ug  sa walay  daghang  langas  miduol  ngadto  sa biktima  dayon  gisumbag  ang  nawong  nga  misangpot  sa pagkatata  lakip  na  ang  ngabil  niini.

Daling miresponde ang kapolisan   busa  nasikop  dayon  ang  suspetsado  samtang  ang  biktima  gidala  usab dayon  ngadto  sa Mandaue City District Hospital.

Miingon si  SPO1 Martin nga  kasong  illegal possession of ammunition  ug  paglapas  sa  Comelec  gun ban   maoy  atubangon sa suspek   kinsa  gidetiner   karon  sa  prisohan  sa maong  dakbayan. (BANAT NEWS)