Kooperatiba sa Lapulapu gipalig-on

CEBU, Philippines - Gisuportahan  sa  kagamhanan  sa dakbayan  sa Lapulapu  ang  gitukod  nga  mga  kooperatiba sa nagkadaiyang  sektor  sa maong  dakbayan  tungod  kay dako  kini  og  ikaabag  sa pagpalambo  sa panginabuhi.

Matud   pa  ni Mayor Paz Radaza usa  sa iyang  gitanyag  sa publiko  nga  angay  pasakopan  nga  kooperatiba  mao  ang  Lapulapu City Cooperative and Livelihood  Resources Center nga gipangulohan ni Jimmy Glomar.

Si Radaza  miingon nga ang kagamhanan sa maong dakbayan hugot nga miila sa kamahinungdanon sa cooperativism alang sa pagpausbaw sa ekonomikanhong kahimtang sa mga Oponganon.

Apan  molampos  lamang  kini kun  abagan  og  salapi  sa kagamhanan aron  labi  kining makasilbi  sa   tanan  niyang  mga  sakop.

Dugang pa niya nga ang cooperative movement dinhi sa nasud  maoy  usa  ka  matang  sa  hinagiban sa  pakigbugno  sa kagamhanan  batok sa kalisud   sa kahimtang  sa  matag pamilya.

Iyang  gihisgotan  nga  sa Lapulapu  naglihok  karon  ang  85  ka  nagkalainlaing  kooperatiba  nga  gipaubos  sa usa  ka pederasyon  nga  gitawag  nga  Lapulapu City Cooperative Network

Dugang pa niya nga nagpahigayon sila karon  og  mga kalihokan  alang  sa dugang  pagpalambo  sa maong  mga  kooperatiba   ug gitanyag usab nila ang  usa  ka  employment services network  alang sa mga  membro  sa kooperatiba  nga  wala  pay trabaho. – (BANAT NEWS)