Shabu nga balor og P400 mil sakmit

CEBU, Philippines - Gibana-banang mobalor og P400 ,000 ang shabu nga nasakmit sa kapolisan sa Basak Police Station sa dakbayan  sa Mandaue  atol sa usa ka checkpoint  nga  ilang  gilusad   sa may J.P Rizal Street, barangay Basak   sa maong dakbayan niadtong Martes sa hapon .       

Ang  mga  pinutos  nga  shabu nasil-ingan  sa  mga  polis  sulod  sa usa  ka  paper bag sa bino nga gikugos-kugos sa suspek.

Ang suspek nailhan nga si Richard Jean Arquillano, 26, ulitawo  nga adunay live-in partner nga taga San Francisco , isla sa Camotes.

Siya luwan sa usa ka Suzuki Raider nga motorsiklo  sa dihang gisita kini sa  kapolisan sa  iyang  pag-agi   sa checkpoint  sa among lugar.

Dihang  gisukit   kini  sa kapolisan, giingong nakiglalis  pa  kini  sa mga  otoridad  human siya masakpi nga nabahas na ang iyang driver’s license.

Busa   gimandoan   dayon ni Basak Police station chief P Sr./Insp. Wilson Abot ang iyang mga tawo nga dad-on ang suspek sa ilang buhatan.

Apan didto sa police station, nadiskitahan ni Abot nga naggakos  kini  kanunay sa  dala niining paper bag  nga  may bino ug  dili  gyud  niini  buhian.

Unya  nasigpatan sa polis nga adunay tin foil  nga sulod  ang  maong paper bag hinungdan nga gisakmit kini ug dihang gikuha ang bino ug gibungkag ang maong paper bag , didto nakit-an sa kina-ilawman niini ang  gilikit pag-ayo nga shabu nga gibanabanang 30 gramos ang  gibug-aton sa usa ka dakong putos, samtang ang laing putos sa shabu  nga gamay-gamay   gibana-bana usab nga motimbang og 5 gramos.

Dihang gisukit-sukit   ang suspek mitug-an kini nga ang maong mga drugas naggikan sa barangay Hipodromo dakbayan sa Sugbo ug giingong igo  lamang  siya  nga  gisugo pag-deliver niini ngadto sa isla sa Camotes.

Gumikan niini,matud pa ni Abot  nga ila pang palawman ang ilang imbestigasyon aron pagdeterminar  kun usa ba lamang ka drug courier ang suspek ug  ilhon usab nila kun kinsa  gayud  ang tag-iya niini o siya ba gayud kaha maoy tag-iya sa maong  mga illegal drugs.

Ang suspek kasamtangang gitanggong sa Basak Police Station samtang gihikay ang kasong kalapasan sa ginadling drugas batok kaniya. (Flor Z. Perolina sa the Freeman ug Lesley Caminade Vestil/WC)(BANAT NEWS)