Dasmag Ceres vs. awto 1 patay 3 angol
CEBU, Philippines - Ang namatay diha- diha mao si lvin Legaspi, hingkod, nga taga Poblacion, Dalaguete, samtang ang mga naangol mao ang drayber ug seaman nga si Emannuel Navarrete, ug mga pasahero niini nga sila si Gerome Carunggay ug Rommel Rodriquez, pulos hingkod ug managsilingan sa Dalaguete.
Samtang ang drayber sa gikaengkwentro nga Ceres Bus nga dunay plaka nga GWK-142 mao si Anthony Oriendo, 36, minyo, nga taga Tagnukan, Lasi, Siquijor.
Si SPO1 Joel Caballero, sa Alcoy Police Station mibutyag sa Banat News nga ang Ceres bus paingon sa siyudad sa Sugbo ug bugtong drayber ug konduktor lang ang sakay niini kay wala pa sila kapunit og pasahero.
Samtang ang gikasugat niini nga Honda Civic nga awto paingon usab sa lungsod sa Boljoon.
Matud ni SPO1 Caballero nga samtang nagdulhog ang awto, nagsaka usab ang Ceres apan tungod kay likoon ang maong karsada giingong mikawat sa pikas lane ang awto hinungdan nga nasungag kini sa Ceres bus.
Napasok ang awto sa ilawom sa Ceres bus ug napiyapi ang atop niini samtang nadat-ugan usab sa ilawom sa maong awto si Legaspi nga naglingkod sa front seat ug gideklarar nga namatay kini diha-diha ni Dr. Max Cang, ang municipal health officer sa Alcoy.
Samtang ang drayber ug ang laing duha pa ka pasahero gihatud dayon ngadto sa Dr. Ildefonso Alcantara Hospital sa lungsod sa Dalaguete nga pulos nakuyapan busa gibalhin dayon kini sa tambalanan sa dakbayan sa Sugbo.
Samtang ang drayber sa Ceres bus nabalhug na karon sa karsel human sa pagtahan niini sa kapolisan ug nagpaabot na lang sa tukmang kiha nga ipasaka batok kaniya sa mga tagtungod sa mga biktima. (/WC)(BANAT NEWS)
- Latest
