Soc modawat og award sa ngalan sa Talisay

CEBU, Philippines - Si Mayor Socrates Fernandez sa dakbayan sa Talisay gitakdang modawat og award tungod sa pagkapili sa siyudad nga Child Friendly City sa regional category niadtong tuig 2012. Ang siyudad sa Talisay makadawat usab  og P50 mil nga cash prize gikan sa rehiyonal nga buhatan sa Department of Social Welfare and Development (DSWD).

Si Merdecita Jabagat, Director IV sa DSWD sa rehiyon mipadala og suwat ngadto sa kagamhanan sa Talisay niadtong Enero 17, 2013 diin si Fernandez ug ang mga opisyal sa CSWD sa maong siyudad  gidapit  sa pagtambong sa 62nd DSWD Anniversary karong Enero 25, 2013 diin sa maong adlaw usab ipanghatag ang mga award sa mga mananaug sa regional category sa mga napiling  child friendly nga  mga  syudad  ug  lungsod  sa rehiyon.

Ang dakbayan sa  Talisay ug lungsod sa Pilar, isla sa Camotes maoy kandidato sa Sugbo nga mosangka ngadto sa national category isip child friendly city and municipality.

Gawas sa Talisay ang laing makadawat og pasidungog mao ang probinsiya sa Bohol nga ubos sa 1st ug 3rd class municipality category ug Pilar, isla sa Camotes nga ubos sa 4th ug 6th class category.

Ang Pilar sa milabay’ng tuig nahilakip usab  sa national finalist samtang ang Talisay maoy unang higayon nga naapil.

Niadtong Oktubre 13 sa milabay’ng tuig ang Talisay ug Pilar gihangop sa kagamhanan sa probinsiya sa Sugbo isip mga child friendly nga mga lugar. Ang Talisay maoy napiling mananaug sa provincial level sa component city category, samtang ang lungsod sa Oslob maoy napili nga mananaug sa 4th ug 6th class municipality category samtang ang lungsod sa Dalaguete maoy napiling mananaug  sa 1st- ug 3rd class municipality category. (BANAT NEWS)