CEBU, Philippines - Kapin lang 113 ka tonelada nga basura ang nahipos sa mga sakop sa Department of Public Services (DPS) sa kadalanan sa Siyudad sa Sugbo pagka-human sa Sinulog Grand Parade niadtong Domingo nga gidagsa og upat ka milyon ka tawo. Sumala pa sa assistant head sa DPS nga si Engr. Randy Navarro nga minos lang kini kumpara sa kapin sa 160 ka tonelda nga basura nga ilang nahipos sa miaging tuig nga Sinulog.
Kasagaran sa mga basura nga ilang nahipos naggikan sa mga sudlanan sa mineral water plastic bags, mga papel ug kinan-an.Tungang gabii pa lang sa Enero 20 gatosan ka mga sakop sa DPS ang nanglimpyo sa kadalanan maong pagsubang sa adlaw limpyo na ang siyudad alang sa pagbalik sa normal nga trabaho ug kalihokan.
Gipadayag ni Navarro nga paspas ang paghipos karon sa basura gumikan kay maayo ang dagan sa panahon dili sama sa miaging tuig nga ang nakalangay sa ilang trabaho mao ang pagbunok sa uwan. (BANAT NEWS)