CEBU, Philippines - Patay ang usa ka lalaki human kini gidunggab sa iyang silingang batan-on pasado alas-8 sa miaging gabii diha sa dalan Tres De Abril sa barangay San Nicolas dakbayan sa Sugbo.
Ang biktima nailhan nga si Rolando Debalucos, 31, ang suspetsado nailhan nga si Beljun Aragon, 18.
Sa pasiunang imbestigasyon sa kapolisan nasayran nga ang biktima naglingkod sa maong lugar dihang kalit kini nga giduol sa suspetsado ug giduslak sa dughan. Patay na si Debalucos pag-abot sa Cebu City Medical Center.
Matod pa ni PO1 John Eric Samosa sa Homicide Section, posibleng gipanimaslan lang ang biktima tungod kay sa sayo pa una pa kini madunggabi nakakita og away ang maguwang ni Debalucos.
Dugang pa ni Samosa nga ang suspetsado nadakpan usab gilayon sa mga sakop sa Barangay Intelligence Network nga dali usab nga mirespondi sa maong alarma inabagan sa kapolisan. (EIM) (BANAT NEWS)