Sinulog 2013 malinawon bisan mas daghan ang mga tawo karon

CEBU, Philippines - Naglaraw ang kapolisan nga i-ban na sa Sinulog Grand Parade ang pagpang-itsa og mga freebies ug souvenirs sa mga artista ug mga kompanyang sakay sa mga floats.

Matud pa sa hepe sa kapolisan sa rehiyon 7 nga si Chief Supt. Marcelo Garbo Jr. nabungkag ang parade tungod sa mga gipanglabay nga mga souvenirs o freebies gikan sa mga floats. Dugang usab ni Garbo nga unta sunod tuig, ma-banned na sa kadagkuan sa Sinulog Foundation ang pagpanghatag og freebies sa katawhan.

Samtang ang hepe sa kapolisan sa dakbayan sa Sugbo Sr. Supt Mariano Natuel Jr. mipadayag usab nga  walay mga dagkong panghitabo nga natala ang kapulisan gawas lang niining mga petty crimes ug uban pa.

Base sa consolidated report sa CCPO sa mga panghitabo sa Sinulog niadtong Domingo, kinse ka mga bata ang nawagtang, 13 niini diha na-report sa Fuente Police Station, usa ka insidente sa pagpanulis, unom ka kaso sa pagpanguot, siyam ka traffic incidents, ug usa ang gidakop tungod sa kahubog.

Bisan walay gitugot nga street party karong tuiga, si Natuel mipasabot nga wala sila’y nadakpan kay wala na nila kini hatagi pa og prayoridad tungod sa kadaghan sa ilang gibantayan.

“I also told our police officers to observe maximum tolerance. This is a fiesta so everybody is entitled to merry-making as long as tolerable lang ang ilang behaviours, ” matud pa ni Natuel. Duna hinuoy rekomendasyon si Natuel nga angayang usbon sa sunod nga Sinulog, pahawanan ang dalan R.R. Landon gikan sa mga tawo ug dugangan pa ang mga bleachers sa Sinulog route aron dili magdasok ang mga tawo sa dalan.  Samtang malinawon ang probinsya sa Sugbo atol sa selebrasyon sa Sinulog base sa assessment ni Deputy Provincial Director for Operation, Supt. Julian Entoma.

Matud ni Entoma nga walay mga insidente nga nahitabo sa probinsiya samtang gipahigayon ang kasaulugan sa siyudad sa Sugbo diin gidagsa kini sa mga tawo. (EIM) (BANAT NEWS)