PNoy mideklarar 2013 isip nat’l year of rice

CEBU, Philippines - Si Presidente Benigno Aquino III mideklarar sa tuig 2013 isip National Year of Rice (NYR) pinaagi sa Proclamation No. 494. Ang NYR usa ka kampanyang gipangunahan sa Rice Research Institute pinaagi usab sa pakigtambayayong sa buhatan sa Department of Agriculture (DA) ubos sa Department of Agriculture's Food Staples Sufficiency (FSSP).

Sumala pa ni DA-7 Regional Executive Director Angel C. Enriquez, nga ang NYR nagtinguha og suporta sa tanang sektor sa katilingban lakip na ang mga prodyuser, mga tiggama og mga palisiya ug usab mga konsumedor aron makab-ot ang Rice Self Sufficiency ning tuiga.

Dugang pa ni Enriquez nga tuyo sa NYR nga kasuportahan  sa media aron masayud ang  tanan  sa kamahinungdanon  sa pagpataas sa produksyon sa bugas.  Daan  na  nga gisaad   ni Kalihim Proceso Alcala  sa DA  nga  sugod  karong tuiga  hunongon  na  sa kagamhanan  ang  pagpangompra  og bugas  humay  gikan sa ubang  kanasuran  sa gawas.

Kini  tungod  kay  iyang nasiguro  nga  ang  tanang mag-uuma  sa nasud naningkamot  nga  makabaton  og taas  nga produksyon  sa  humay  nga sarang  ikasustinto  sa 95 milyones  nga  mga  Filipino.

Gipadayag ni Enriquez nga ang NYR sa tuig 2013 mao ang usa sa nag-unang stratehiya sa pagkab-ot sa rice self sufficiency pinaagi sa pagpadasig sa mga mag-uuma  sa pagsagop sa mga teknolohiya nga makapalambo sa ilang ani  sa kahumayan. Kauban  usab  niini  ang  pag-awhag sa publiko nga mahimong responsabling konsumedor sa mga produkto  sa kaumahan  sa nasud.

Giawhag ni Enriquez ang publiko nga mohatag unta og pagpakabana sa paggamit  og hustong konsumo sa bugas ug sa dili pag-usik-usik niini.

Samtang sa bahin ni Presidente Aquino iyang gipanaad nga ihatag niya ang iyang kinatibuk-ang suporta sa buhatan sa DA sa tinguha nga dili na mamalit ang Pilipinas og bugas  sa laing nasud tungod kay inanay nang nabanhaw ang maayo ug taas nga kalidad nga teknolohiya sa produksyon  sa bugas dinhi  sa nasud. (/WC) (BANAT NEWS)