Garbo ginganlan ni Garcia og unprofessional

CEBU, Philippines - Ginganlan  ni 3rd District Cong. Pablo John PJ Garcia nga usa ka "unprofessional" si PRO-7 Regional Director Marcelo Garbo gumikan  sa pagwagtang  niini sa  mga polis escort ni suspended governor Gwendolyn  Garcia. Ang  mga  escort  nga  polis  wala  na  pakuyoga  sa suspendidong gobernador    paingon ngadto sa Cebu City Sports Complex ug sa pagsayaw  niini sa Sinulog 2013 niadtong miaging Domingo.

Sumala pa ni  PJ Garcia nga dili makatarunganon ang pag-recall ni Garbo sa upat ka mga polis nga mibantay sa gobernador sanglit wala siya’y nakitang kasaypanan sa maong polis  sa pagguwardiya niini  sa  nasuspensong gobernador.

Gitataw  sa kongresista  sa ikatulong distrito   nga ang nahisgutang mga polis igo ra nagsiguro  sa suspendidong gobernador  atol sa  Sinulog parade

Gawas niini, nahibaw-an usab sa buhatan sa  gisuspensong  gobernador nga ang mga kanhi police escort niini nga unang gipa-recall ni Garbo gilabay  ngadto sa lalawigan sa Negros.

Si  PJ Garcia miingon  nga dako kaayong insulto sa mga Sugboanon ang gihimo ni Garbo tungod kay nagpakita kini  sa  padayon  nga  personal nga kalagot ni Garbo ngadto sa nasuspenso  nga  gobernador ug sa pamilyang Garcia

Samtang gitataw usab ni  PJ Garcia nga wala sila matandog   sa resolusyon sa COMELEC nga nag-ila kang Acting Gov. Agnes Magpale nga maoy incumbent governor ug maoy mahatagan og duha ka mga police escort sa pagsugod na sa kampanya alang sa umaabut nga election.

Gisuwayan og  tawag sa Banat News  si Garbo  kun  unsay  iyang  reaction  sa pamahayag  ni PJ  Garcia  apan  wala  siya  makontak.(/WC) (BANAT NEWS)